Qırımda FTH, işğalde bulunğan soy-soplarını ziyaret etmek içün yarımadağa qaytıp kelgen bir qaç qırımtatarnı yaqaladı. Şimdilik işğalciler tarafından aynı nasıl qabaatlavlar qoyulğanı belli degil.
Bu aqta Facebook-ta qırımtatar halqı Meclisiniñ reisi Refat Çubarov bildirdi.
"Soñki künlerde Qırımda çoq vaqıt uzaqlaşqan soñ, qart ana-babalarını ya da hasta soy-soplarını ziyaret etmege qarar bergen qırımtatarlarnıñ bir qaç kere tutulğanı aqqında belli oldı. Teessüf ki, bizge bütün allar ve qabaatlavlarnıñ maiyeti belli degil, çünki tutulğanlarnıñ soy-sopları FTH-niñ hadimleri tarafından qorquzılıp er bir bağdan uzaq turalar", – bildirdi Çubarov.
Qırımtatar halqı Meclisiniñ başı, işğal yarımadasına böyle seyaatlar qırımtatarlar içün pek havflı olğanını ayrıca qayd ete.
"Yarımadada çoqtan berli ğayıp olğan er bir qırımtatar erkegi ya da qırımtatar qadını Rusiye cezacıları tarafından ayrıca diqqat obyektine çevirilgeni açıqtır", — dep yaza qırımtatar halqı Meclisiniñ başı.
Hatırlatamız ki, Qırımtatar Resurs Merkezinde Rusiye Federatsiyası İnterpolğa "qırmızı bildirüvler" dep adlandırılğan şeylerni yollamağa devam ete, dep bildirgen edi. Rusiye FTH-niñ talabı ile Frenkistanda İnterpol tarafından 33 yaşlı qırımtatar İlnur Şagayevniñ yaqalanğanı aqqında belli oldı. O, qorantasınen beraber Qırımdan büyük miqyaslı ücüminiñ başlanmazdan evel çıqıp, İrlandiyada muvaqqat qorçalav aldı. Apiske alınuv, Büyük Britaniyağa ketken paromğa mingende olıp keçti.
KRM-niñ başı Eskender Bariyevniñ aytqanına köre, Rusiye qırımtatarlarnı ilerideki taqipleri içün apiske almaq içün İnterpolnı qullanmağa tırışa, böyleliknen, adamlar, malümatsız, seyaat vaqtında tutulıp, soñra Rusiye Federatsiyasına ekstraditsiya etile bile.
Telegram, WhatsApp, Facebook ve YouTube-ta Suspilne Qırım haberlerine abune oluñız
