Baş istihbarat idaresi işğal etilgen Qırım limanlarına kirgen Rusiyeniñ "talda flotu"nıñ daa 20 gemisini belgiledi. Malümat War & Sanctions portalında yerleştirildi. Umumen cedvelde 626 gemi bar.
Bİİ Telegramda bunı bildirdi.
"Belgilengen tankerlerniñ bir qısmı Rusiye şirketlerinen bağlı, şu cümleden sanktsiya altında bulunğan şirketlernen bağlı, şu cümleden: "Volgotanker" AT, "Volgotrans" TOV, "Rouzvud Şıpping" TOV, "Enea" TOV, "SBK Dolına" TOV, "Rodnıye polâ" TOV ve "Staksel" TOV", — dep aytıla haberde.
Bİİniñ haber etkenine köre, bu gemiler, kerekli ğarbiy sigortasız, Rusiyeniñ deñiz neft ve neft mahsulatlarınıñ Baltika ve Qara deñizlerindeki limanlardan, em de Arktika ve Tınç okean bölgelerinden Hindistan, Çin ve diger memleketlerge aldatıcı ve yüksek telükeli gemiler qullanıp, ihrac aqımını temin ete.
Hatırlatamız ki, Rusiye ğarbiy sanktsiyalardan qaçmaq ve milliardlarnen dollarlıq neft ihracatını yapmaq içün biñden çoq eski tankerlerden ibaret talda flotunı meydanğa ketirdi, dep 2024 senesi ilk qış ayında Baş istihbarat idaresi bildirdi. Bu paralar Rusiyeniñ mudafaa-sanayı kompleksini besley. Tankerlerniñ cedvelini War & Sanctions portalında baqmaq mümkün.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
