Qırımdaki bu yaznıñ anomal yüksek sıcağı — +38°C — topraq qurğaqlığını kerginleştire bile. Rusiye alimleriniñ malümatına köre, iklim deñişüvi sebebinden suv daa tez buvlanıp, özenler saylaşa.
TASS agentligine Vernadskıy adına QFUniñ Tavriya akademiyasınıñ dotsenti İğor Vahruşev bunı bildirdi.
Onıñ aytqanına köre, Qırımdaki iklim deñişüvi şaraitinde yağanaqlarnıñ teñ olmağan dağılımı qayd etile: bazı yerlerde yağanaqlar daa çoq, bazı yerlerde daa az ola. Sıcaq ve quru vaqıtlarda bu farqlılıq daa ziyade körüne ve yerli qurğaqlıqlarnı kerginleştire bile. Qırımnıñ suvı yapma göllerinde toplana, onıñ seviyesi ise yapma göllerine suv bergen özenlerge ve yağanaqlarğa bağlıdır.
"Şimdiki anomal sıcaq vaziyetni kerginleştire bile — yüksek sıcaq, topraq, ösümlik ve suvlardan nemniñ buvlanuvını tezleştire, quru vaziyetke ketire. Suv resursları sıñırlı olğan Qırım içün bu hususan aktualdir. Şimdilik qurğaqlıq kritik seviyege yetmedi, amma yüksek sıcaq ve deñişken yağanaqlar birleşmesi qurğaqlıq adiselerini yaqın kelecekte daa sıq ve daa çoq ola bile", — dedi İğor Vakhruşev.
Hatırlatamız ki, yaz mevsiminiñ başlanmasınen Rusiyege boysunğan Qırım akimiyeti Biloğirsk (QarasuvbazarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) yapma gölüniñ resurslarınen cenübiy-şarqiy Qırımnıñ ihtiyaclarını temin etmege tırıştı. İlk yaz ayınıñ 20-sinde, yapma gölünde suvnıñ bir qısmını saqlamaq içün, suv taşuvını toqtatmaq kerek oldı. Akimiyet, arman ve ilk küz ayları eñ çoq suv qıtlığı ola bilecegini añlay, şunıñ içün şimdilik Biloğirsk (Qarasuvbazar) suv anbarınıñ suvını iqtisat etmege mecbur.
Qırımdaki bölge gidromettsentriniñ malümatına köre, oraq ayınıñ 12-ne qadar yarımadada anomal sıcaq ava beklenile, ava arareti +33°... +38°C, oraq ayınıñ 13-14 künleri ise 36-37 derecege qadar sıcaq beklenile.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
