İşğal etilgen Qırımda 2025 senesiniñ birinci yarısında 99 insan yaqalandı. Olarnıñ 48-i — qırımtatar. 2024 senesi aynı müddet içinde 92 insan, 2023 senesi — 140 insan tutuldı.
Matbuat konferentsiyası devamında Qırımtatar maaliy merkeziniñ (QMC) kommunikatsiyalar idarecisi Tetâna Savçuk bunı bildirdi.
"Bu kategoriyamız bir qaç qısımdan ibaret. Birinciden — mahkeme ükümleri, soñra — yañı apis cezaları ve memuriy apis cezaları. Bu müddet içinde eñ az 32 mahkeme ükmü, 39 yañı yaqalav ve beş memuriy apis cezasını qayd ettik. Bu davalarnıñ er birinde, şahısnıñ soyadı, mahküm etilgenlerniñ sayısı yazılğan", — dedi o.
2025 senesiniñ altı ayı içinde işğalciler Qırımda 64 insannı tuttılar. Olardan 13-ü — qırımtatar halqınıñ vekilleri. 2024 senesiniñ aynı müddetinde 71 insan yaqalandı, dep QMMniñ idare yolbaşçısı Eskender Bariiev bildirdi.
"Aynı müddet devamında 77 sorğu, sorav ve subet qayd etildi — 20-si qırımtatarlarnen. 150 adil mahkeme aqqınıñ bozuluvı — 75-i tamır halqınıñ vekillerine nisbeten. 2025 senesiniñ birinci yarısında eñ az 26 kere beden ve ruhiy sağlıqnıñ eñ yüksek seviyesine aqqınıñ bozuluvı qayd etildi, olardan 19-ı tamır halqınıñ vekillerine nisbeten", — dedi o.
Hatırlatamız ki, işğalciler Qırımda "Rusiye ordusını itibardan tüşürgen" 1435 dava açtılar. İşğal altındaki yarımadada 221 insan bu "qabaatlavlar" boyunca apiske alındı, dep "Suspilne. Studiya"nıñ canlı yayınındam Ukrayina prezidentiniñ Qırım Muhtar Cumhuriyetindeki daimiy temsilcisiniñ muavini Denıs Çıstikov bildirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
