Qırımnıñ Yevpatoriya (KezlevRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) ve Bağçasaray rayonlarınıñ meskün yerlerinde, işğal etilgen Aluşta, Saq şeerlerinde elektrik fevqulâde rejimde söndürildi.
İşğalli "Krımenergo" bu aqqında haber etti.
Bağçasaray rayonınıñ Holmivka, Hoca Sala, Tankove, Kripke köylerinde elektrik yoq.
Yevpatoriya (Kezlev) rayonında elektriksiz qalğan köyler: Lisnivka, Şovkovıçne, Mıtâyeve, Verşınne, Trudove.
Aluştadaki transformator stantsiyalarında yüz bergen qaza sebebinden elektrik kesildi.
9 transformator stantsiyası söndürildi, dep şeerniñ başı Galina Ognevniñ malümatına esaslanıp, RİA "Novosti Krım" bildirdi.
Hatırlatamız ki, işğalli Qırım akimiyeti sıcaq ava sebebinden elektrik energiyasınıñ qullanuvını eksiltmege rica etti. İşğalciler tenbiyeleyler ki, aşırı yüklenüv olsa, yarımadanıñ elektrik ağında qazalar ola bilir.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
