Ruslar, Sevastopoldan (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki addan) 20 studentni Rusiye ordusı tarafından işğal etilgen Energodar yanındaki Zaporijjâ AESa ketirdiler. İşğalli reberlik işğal etilgen atom stantsiyasında çalışmağa devam etmeleri içün olarğa iş añlaşmalarını tizdiler.
ZAESnıñ işğalli matbuat hızmeti Telegramda bunı bildirdi.
Belli olğanı kibi, eki student Rusiye tarafından işğal etilgen Sevastopol (Aqyar) devlet universitetiniñ 5-inci kursında oquy ve yaqında Zaporijjâ AESda çalışmağa başlaycaq. Digerleri daa teşkerüvde.
"Er kesniñ Zaporijjâ AESnen añlaşmaları bar. Bugün kelecek zenaatdaşlarımıznen körüşemiz", — dep işğal etilgen ZAESnıñ oquv-idman merkeziniñ reberi Valeriy Martınük qayd etti.
İşğalcilerniñ aytqanlarına köre, talimler özek stantsiyasında degil de, talim merkezinde ve poligonında keçirilecek.
"Şimdiki şartlar aqiqiy iş yerinde ameliyat keçirmege imkân bermey, onıñ içün oquv-idman merkezinde keçirile, anda şarait istisalge eñ yaqın ola", — dep işğalli ZAES müdiri Yuriy Çernıçuk qayd etti.
Hatırlatamız ki, oraq ayınıñ 4-nde Zaporijjâ AES Rusiye ordusınıñ ateşi sebebinden "qaranlıq"qa oğradı. "Energoatom" AT bildirgeni kibi, ukrayin mütehassıslarınıñ ğayretleri sayesinde saat 21:11-de ava attı kene ZAESa qoşuldı ve stantsiya Ukrayina energetik ağından elektrik energiyasını ala başladı.
"Bu arada, vaqtınca işğal etilgen stantsiyada vaziyet qıyın olıp tura. Zaporijjâ AESı tek bir energiya menbasına esaslana", — dep "Energoatom" AT bildirdi.
Zaporijjâ AESdaki vaziyet aqqında ne bilemiz
Avropanıñ eñ büyük atom stantsiyası olğan ZAES, 2022 senesi saban ayınıñ 4-nden berli Rusiye arbiyleri tarafından zapt etilgen. Rusiye Federatsiyası stantsiya meydanında arbiy tehnikası ve silâsını yerleştire. Orta küz ayınıñ 5-nde Rusiye prezidenti Vladimir Putin Zaporijjâ AESnı federal mülkiyetke bermege emir etti. Bundan da ğayrı, ruslar ZAESnı idare etecek şirketni meydanğa ketirdiler. Energoatom bu qararnı "boş" dep adlandırdı ve RFnıñ Ukrayina topraqları ve ZAES "qoşulması" aqqında qararı USQ içün emiyetsiz olğanını hatırlattı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
