İşğal etilgen Qırımnıñ Kirov rayon mahkemesi "Eski Qırım" mustaqil musulman diniy cemiyetini aşırıcı malümat tarqatqanında qabaatlap, 400 biñ ruble para cezasını berdi.
Cemaatnıñ advokatı Nazim Şeyhmambetov "Qırım birdemligi"ne bunı bildirdi.
O, tintüvniñ bir çoq bozuluvı aqqında tarif etti, hususan, resmiy tahqiqat tedbirleri başlamadan evel quvetçilerniñ camige qanunsız kirmesi.
Uquqçı qayd etti ki, videolarda quvetçilerniñ camige saba saat 6:50de kirgenleri körüne, protokolda qayd etilgen operativ-qıdıruv tedbirleriniñ resmiy başlanuvından evel — saat 7:00de.
"Videolarda körüne ki, adamlar kirip, elektrik kesicisini söndürdiler, yani camini söndürdiler, birisi zalğa kirdi, soñra ise bir şeyge işaret ettiler. Farqlı tahminler yapıla bile. Tek bundan soñra ODFOperativ-qıdıruv faaliyetiniñ iştirakçileri, cemaat vekilleri ve caminiñ saibi davet etildi ve kitaplar tapıldı. Bu, ODF keçirilmesiniñ qaba bozuluvıdır. Bu protokol qabul etilmey. Amma mahkeme bu delillerni red etti, çünki tedbirniñ keçirilüv yeri ve vaqtını tasdıqlap olamay", — dep Nazim Şeyhmambetov añlattı.
Bundan da ğayrı, advokat qayd etti ki, "Eski Qırım" cemiyeti caminiñ saibi degil ve onıñ içindekilerinden mesüliyet çekemez.
"Protokolda "asıl qullanuv" ıstılası qullanıla. Amma uquq tilinde aytsaq, bu böyle bir şey qullanılmaz. Ve böyle bir tarifiy qararğa esaslanıp, başqa adres boyunca qayd etilgen cemiyetniñ camide qanunğa riayet etüvini temin etmek kerek olğanını aytmaq mümkün degil edi", — dep qoştı o.
Dava ilk yaz ayınıñ 5-nde Eski Qırım şeerindeki "Zubeyr Cami"de keçirilgen tintüvden soñ açıldı. Bir aftadan soñ cemaat reisi İdris Yurdamov memuriy protokol tizilgeni aqqında haber aldı. Vesiqağa binaen, camide keçirilgen tintüv vaqtında Rusiye akimiyeti tarafından "aşırıcı" olaraq tanılğan malümat tapıldı.
Soñki bir yılda cemaat içün bu endi ekinci ceza. 2024 senesi saban ayında yasaq etilgen edebiyatı — Sayid Nursiniñ "Munecat (Dua).Üçünci ışıq" ve Taqiyuddin an-Nabhaniniñ "İslâm sisteması" kitapları saqlağanı içün 100 biñ ruble para cezasını aldı. Çiçek ayında Qırım Yuqarı mahkemesi bu para cezasını qaldırdır.
Telegram, WhatsApp, Facebook, TikTok ve YouTubede Supilne Qırım haberlerine abune oluñız
