Rusiye deñiz askerleri içün REB aletlerini işlep çıqarğan Qırımdan işğalli mebus Ukrayinada ğıyabiy şekilde mahkeme etilecek. Ukrayina havfsızlıq hızmeti oña qarşı mahkemeden evel taqiqatnı yekünledi.
UHH Facebookta bunı bildirdi.
Adamnı dört madde boyunca mahkeme etecekler: duşmannen işbirlik faaliyeti (111-1 maddesiniñ 6-ncı qısmı ve 111-1 maddesiniñ 5-inci qısmı), istilâcı devletke yardım111-2-nci maddesiniñ 1-nci qısmı ve onı aqlav436-2-nci maddesiniñ 3-nci qısmı, Rusiye Federatsiyasınıñ silâlı istilâsını qanuniy sayuv.
"Bu, sözde "Sevastopol şeeriniñ üçünci çağıruv qanun çıqarıcı toplaşuvı"nıñ işğalli mebusı ve "tasil, ilim, medeniyet, sport ve gençlik siyaseti eyyetiniñ reisi" aqqında söz yürsetile. Tahqiqat malümatına köre, cinayetçi duşman silâlı quvetlerini REB vastaları, arbiy optikası ve donatmanen temin ete. 2024 senesi o, Rusiye deñiz piyade brigadası içün dronğa qarşı tüfeklerniñ işlep çıqarılmasını teşkil etken edi", — dep aytıla haberde.
UHHniñ malümatına köre, mebus 2014 senesi Qırımnıñ zapt etilmesine qol tuttı ve qanunsız referendumnıñ teşkil etilmesinde iştirak etti.
"Bu areketleri içün işğalcilerden "Yedinaya Rossiya" firqasınıñ mebusı "Sevastopol şeeriniñ Gagarin belediye bölgesiniñ şurası"nda "yer" aldı, — dep UHH yazdı.
Qırım Muhtar Cumhuriyeti ve Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) şeeriniñ prokurorlığı qayd etti ki, Ukrayina Anayasasınıñ 62-nci maddesine binaen, şahıs cinayet işlegeninde qabaatsız sayıla ve qabaatı qanuniy şekilde isbatlanıp, mahkeme tarafından qabaatlav qararı çıqarılğance, cinaiy cezanı çekip olamay.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
