Baş istihbarat idaresi, işğal etilgen Qırımda Rusiye tarafından zapt etilgen 110 medeniy eser aqqında malümatnı derc etti. Malümat War&Sanctions portalında "Hırsızlanğan miras" bölüginde yayınlandı.
Bu, 2014-2025 seneleri yapılğan arheologik qazmalarda rusiyeliler tarafından zapt etilgen eserlerdir, dep Bİİ bildirdi.
"Bu eserler işğalciler tarafından böyle arheologik obyektlerde qanunsız arheologik qazmalarda tapıldı: "Artezianlar meskün yeri", "Çembalo ceneviz qalesi", Hersones şeeriniñ cenübiy civarı. Bundan da ğayrı, işğalli Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad — terciman) akimiyeti ticaret merkezini qurmağa planlaştırğan Kadıköy (Roma lageri) şeerçigi toprağında qıymetli şeyler, em de tecavuzcı tarafından Yekaterinburg tarih müzeyinde muvaqqat sergi altında "Hersones" milliy qoruğından çıqarılğan eksponatlar aqqında malümat derc etildi", — dep aytıla haberde.
Hatırlatamız ki, saban ayında Bİİ, vaqtınca işğal etilgen Qırımdan "Nimfey" ve "Pantikapey" qadimiy şeerleriniñ qazmalarında tapılğan eñ az 164 arheologik artefakt çıqarılğanını bildirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
