Rusiye ukrain medeniy mirasını qanunsız şekilde zapt etmege devam ete. Vaqtınca işğal etilgen Qırımdan "Nimfey" ve "Pantikapey" qadimiy şeerleriniñ qazmalarında tapılğan eñ az 164 arheologik artefakt çıqarıldı.
Ukraina Mudafaa nazirliginiñ Baş istihbarat idaresi bu aqqında haber etti.
Nazirlik qayd etti ki, Rusiye müzeyleri muntazam sürette işğalni qanuniyleştirmek ve ukrain müzeyleriniñ Rusiye medeniy boşluğına integratsiyasına doğrultılğan sergiler, lektsiyalar ve tasil programmalarını keçire.
Bundan ğayrı, Ukraina Mudafaa nazirliginiñ Baş istihbarat idaresi, işğal etilgen topraqlarda medeniy degerliklerniñ hırsızlanmasına yardım etken ve teşviqat faaliyetine alâqası olğan 14 Rusiye müzey hadiminiñ cedvelini derc etti.
İştirak etken şahıslar arasında:
- İrina Jukova — Bütünrusiye tarihiy-etnografik müzeyiniñ müdiri, işğal etilgen topraqlarda teşviqat sergileriniñ teşkilâtçısı.
- Oleksandr Şkolnik — 2023 senesi vaqtınca işğal etilgen Donetsk şeerinden müzey hadimlerine Rusiye tarihınıñ ögrenüv usullarını ögretken Ulu Vatan cenkiniñ müzeyi müdiridir.
- Sergey Narışkin - "Vatan tarihı" fondunıñ ve Ukrainanıñ vaqtınca işğal etilgen topraqlarında bölükleri olğan Rusiye tarihiy cemiyetiniñ yolbaşçısı olğan Rusiye tış istihbarat hızmetiniñ yolbaşçısı.
Telegram, WhatsApp ve Facebookta Suspilne Qırım haberlerine abune oluñız
