Qırımtatar maaliy merkeziniñ (QMM) yolbaşçısı Eskender Bariiev Ukrayina cenübinden qırımtatarlarğa qarşı siyasiy sebeplerden yapılğan taqip aqqında bildirdi. Söz, Herson vilâyetiniñ işğal etilgen qısmındaki Partizanı (Rıkove) qasabasınıñ sakini qırımtatar Eldar Kestan, yerli Partizan Qırımtatar Milliy Meclisiniñ azası aqqında kete. İşğalli akimiyet onı "Noman Çelebicihan adına qırımtatar batalyonında iştirak etkeni" içün 3 yıl 6 ayğa mahküm etti.
Oraq ayınıñ 3-nde o, Facebook saifesinde bunı bildirdi.
Bariievniñ malümatına köre, Eldar 2023 senesi oraq ayınıñ 7-nde tutuldı. Ay devamında ailesiniñ onıñ bulunğan yerini bilmey edi. Aynı vaqıtta, arman ayınıñ 3-nde esas aqları bozulğan ilk mahkeme oturışı olıp keçti: bağ, advokat ve tuvğanlarğa irişim yoq edi, dep uquq qorçalayıcı qoştı.
QMMniñ reisi, Kestannıñ uquq qorçalayıcılarnıñ malümatına köre, işkence adiseleri qayd etilgen Çonğar köyünde izolâtsiyada tutılğanını bildirdi.
2023 senesi boş aynıñ 28-nde oña oña Rusiye Ceza qanunnamesiniñ 208-inci maddesiniñ 2-nci qısmına binaen üküm çıqarıldı — "federal qanunğa zıt kelgen silâlı birleşmede iştirak etüv". Krasnoyarsk vilâyetiniñ Yeniseysk apishanesinde bir yıldan soñ, 2025 senesi çiçek ayınıñ 15-nden itibaren Krasnoyarsktaki 17-nci sert rejimli müstemlekege avuştırıldı.
Eldarnen bağ tek mektüpler vastasınen ola, Bariievniñ aytqanına köre, mektüpler bayağı vaqıt keçken soñ kele.
Onıñ malümatına köre, Kestan Noman Çelebicihan adına batalyonda iştirak etkeni içün qanunsız sürette mahküm etilgen 57-inci Ukrayina vatandaşı oldı. QMMniñ reisi qayd etti ki, bu — Rusiye tarafından repressiv mahkemeler, işkence ve sahte davalar vastasınen kerçekleştirilgen qırımtatarlarğa qarşı sistematik taqipniñ bir qısmıdır.
Bariiev, işğal etilgen topraqlardaki ve Rusiye Federatsiyasında azatlıqtan marum etüv yerlerinde qanunsız tutulğan diger ukrayin vatandaşları ve Eldar Kestan davasınıñ aydınlatılmasını ve azat etilmesini talap ete.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
