İşğalciler tarafından "devlet hainligi"de qabaatlanıp, 11 yılğa azatlıqtan marum etilgen Qırım siyasiy mabüsi İvan Yatskinniñ anası vefat etti. O, Qırımdan 4 biñ kilometr uzaqta Kemerovo şeerindeki 5-nci müstemlekede tutula, şunıñ içün adam anasınen vedalaşıp olamadı.
Suspilne Qırımğa onıñ apayı Gülnara Yatskina bu aqqında tarif etti.
"Soñki vaqıtları o pek ağır alda edi. Kiçik ayda onı hastahanege alıp kettim, nefes alması pek qıyın edi. O, köküs kanseri ve astma olğan edi. O, nefes alıp olamadı", — dep Gülnara tarif etti.
Kreml esiriniñ apayı, oña anasınıñ ölümi aqqında cep telefonı vastasınen haber etkenini, amma onı cenazege yibermegenlerini qayd etti.
"İlk yaz ayınıñ 21-nde menim doğğan künüm. Vadım maña saba erte hayırlamağa telefon etti. Men oña ne olğanını añlattım. Onı bazarertesi künü, 23-ünde, defin ettik. Vadım o künü de telefon etti. Oña telefon etmege izin berdiler", — dep Gülnara hatırladı.
Kreml reinesiniñ tuvğanlarınıñ Qıımtatar maaliy merkezine aytqanlarına köre, oña anasınıñ ölümi aqqında cep telefonı vastasınen haber etildi, amma onı cenazege yibermediler. Onıñ qorantası adliyeci ya da körüşüvlerge barıp olamay.
"Bu yıl ve kelecek yıllarda biz onı körmege çıqıp olamaycaqmız. O yerge barmaq pek qıyın", — dep olar QMMe ayttılar.
Şimdilik adamğa şahsiy advokat yardım ete. O, yılda bir qaç kere kele ve, esasen, müstemlekede qaidelerniñ yerine ketirilmesini teşkere, amma bu pek az yardım ete.
Olarnıñ aytqanlarına köre, şikâyetlerni baqmaq şimdilik imkânsız, çünki dava mürekkeptir ve büyük teşkilâtlardan destek yoq.
Aynı vaqıtta adamnıñ sağlığı fenalaştı. İlâclarnı qoranta öz parasına ala.
"Onıñ tişleri bayağı çırpınğan, ayağı da tromboflebit hastalığını (trofik yaralar) çeke. Müstemlekeden evel bu bir ayağında edi, şimdi ise ekinci ayağında da bar", — dep qoranta azaları qayd ettiler.
Keçenlerde Yatskin hastahaneden çıqarıldı, oña antibiotikler berildi, lâkin kapelnitsa qoyulmadı.
İvan Yatskin aqqında ne bilemiz
2019 senesi ilk qış ayınıñ başında Rusiye quvetçileri işğal etilgen Qırımda Simferopol (Aqmescit) sakini İvan Yatskinni "devlet hainligi"nde qabaatlap yaqaladılar. Daa soñra adamnı Moskvağa alıp kettiler. İvan Yatskinniñ adliyecisi Mıkola Polozov davanı gizli tutmaq içün imza attı.
2020 senesi mayısnıñ 21-nde işğalli Qırım Yuqarı mahkemesi Yatskinniñ 11 yıllıq apis cezasını ilân etti. Daa soñra onı Kemerovo vilâyetiniñ Bilovo şeerindeki 44-nci tüzetüv müstemlekesine etap ettiler.
2022 senesi kiçik ayda advokat Mıkola Polozov haber berdi ki, rus apishanecileri İvan Yatskinni zulum eteler, çünki o Ukrainanı aqaret etmege izin bermedi. İmayeciniñ malümatına köre, Yatskin açlıq çekmege başladı.
2022 senesi bozarğan ayda Rusiye Yuqarı makemesi, onıñ ükümine kasatsiya şikâyetnamesini red etti.
2024 senesiniñ küzünde Yatskin ŞİZOda 50 kün keçirdi. Uquq qorçalayıcılar qayd ettiler ki, cezanıñ sebepleri uydurılğan bozuvlar oldı, siyasiy mabüs ise Rusiye apishanesinde insan aqlarınıñ bozuluvınen qarşılaşa.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
