Qırım siyasiy mabüsi İvan Yatskin 5-nci Kemerovo rusiye apishanesinde insan aqlarınıñ bozuluvınen qarşılaşa. Anda o, "devlet hainligi"nde qabaatlanıp, 11 yıllıq apis cezasını çeke. Bu küz o, ceza izolâtorında 50 kün keçirdi.
Qırımtatar Maaliy Merkezine siyasiy mabüsniñ tuvğanları bu aqqında haber ettiler.
"İvannı ŞİZOda tutmaqnıñ sebebi, uydurılğan qabaatlamalar oldı. Birinciden, bu, sanki bir yerden bir yerge ketmek, soñra — izin berilgen vaqıt başlamazdan evel yataqhanede qalmaq ve aqşam teşkerüv vaqtında selâmlaşmaqtan vazgeçmek. ŞİZOda bulunğan vaqıt qorantasından qalğan şeylerni baraklarda baqmayıp qaldırdılar, ve olarnı başqa mabüsler hırsızladılar. Müstemlekeniñ memuriyeti İvanğa olarnı almağa ruhset bermedi, çünki eyyetten soñ onı ceza izolâtorına yolladılar", — dep bildirildi.
Tuvğanlarınıñ aytqanına köre, siyasiy mabüske ayda bir kere telefon etmege izin bereler, başqa alâqalar mektüpler vastasınen ola.
Müstemlekede Yatskinge tibbiy baquvlar qısmen berile, amma onıñ sağlıq vaziyetinen bağlı şikâyetlerine kerekli cevap berilmey. Beslenüv seviyesi de alçaq, bazıda sımarlanğan, temizlenilmegen ububatnı aşatalar.
Hatırlatamız ki, 2019 senesi ilk qış ayınıñ başında Rusiye quvetçileri vaqtınca işğal etilgen Qırımda Aqmescit şeeriniñ sakini İvan Yatskinni "devlet hainliginde" qabaatlap yaqaladılar. Daa soñra adamnı Moskvağa etap ettiler. İvan Yatskinniñ advokatı Mıkola Polozov dava malümatını bildirmeme añlaşmasını imzaladı. 2020 senesi mayısnıñ 21-nde işğal etilgen Qırımnıñ Yuqarı "makemesi" siyasiy mabüs İvan Yatskinni sert rejimli müstemlekede 11 yılğa üküm etti.
Telegram, WhatsApp ve Facebookta Suspilne Qırım haberlerine abune oluñız
