Ukraina Telükesizlik Hızmeti, bu gece işğal etilgen Qırımğa ukrain dronlarınıñ ücümi aqqında haber etti. Ukraina mahsus hızmetiniñ malümatına köre, "Kirovske" arbiy aerodromındaki nişanlar uruldı.
Bu aqta UTH-niñ matbuat hızmetinde bildirildi.
"Kiraz aynıñ 27-28 gecesinde Ukraina mahsus hızmetiniñ dronları vaqtınca işğal etilgen Qırımdaki "Kirovske" arbiy aerodromını ücüm ettiler. Aviatsiya komponentiniñ yerleşken yerlerine, avadan imaye etüv tehnikasına, cenk silâlarını saqlav ve istihbarat anbarlarına yanğın zarar ketirildi", – denile beyanatta.
UTH-niñ malümatına köre, vertolötlar ve "Pantsir-S1" avadan imaye etüv sistemaları yoq etildi. Gece içinde aerodromda ekinci patlav olıp keçti.
"Elde olğan malümatlar çoq maqsatlı ve ücüm vertolötları Mi-8, Mi-26 ve Mi-28, em de "Pantsir-S1" öz-özüni aydağan top raketa ve top sistemasınıñ yoq etilgenini köstere", — dep haber ete UTH.
Telegram, WhatsApp, Facebook ve YouTube-ta Suspilne Qırım haberlerine abune oluñız
