Sürgünlik aqqında "Haytarma" filminiñ numayışı, İndistanda kiraz aynıñ 26 künü olıp keçti. Tedbir, bu künde qayd etilgen Qırımtatar bayrağı kününe bağışlanğan.
Bu aqta Prezidentniñ Qırımdaki vekilligi bildirdi.
"Haytarma" (qırımtatarca — "qaytarma") — asılı qırımtatar olğan rejissörı Ahtem Seytablayevniñ ukrain tarihiy faciasıdır. Film, 1944 senesi qırımtatar halqınıñ sürgünligine bağışlanğan ve "Eñ yahşı ecnebiy tilde film" numayışında "Oskar" mukâfatına ukrain resmiy namzeti oldı.
"Haytarma", areketke çağıruvnı, adaletke işançnı ve umumiy kelecekniñ tasavvurını timsal ete", — dep qayd etti QMC-deki prezidentniñ daimiy vekili Olğa Kurışko canlı muracaatında.
O, em de qırımtatar bayrağı kününde böyle tedbir keçirilmesi timsaliy olğanını qayd etti.
"Bugün, uzaqqa sozulğan Rusiye işğali şaraitinde, halqara uquqlar bozulğanda, Qırım toprağı istismar etilgende, bu bayraq qarşılıq, ümüt ve istiqrarnıñ qudretli timsaline çevirildi. O, tek qırımtatarlarnı degil de, serbestlik, adaletli insan aqları ve bütün serbestlik tarafdarlarını birleştire", – dep qayd etti.
Tedbir, Ukrainanıñ İndistan Cumhuriyetindeki elçiligi tarafından Romaniyanıñ İndistan Cumhuriyetindeki elçiliginen beraberlikte Ukraina Prezidentiniñ Qırım Muhtar Cumhuriyetindeki Vekilligi ve Qırım platforması ile işbirlikte teşkil etildi.
Hatırlatamız ki, Qırımtatar bayrağı künü qırımtatar halqınıñ vekillik organlarınıñ teşebbüsinen 2010 senesi başlanğan resmiy olmağan bayramıdır.
Telegram, WhatsApp, Facebook ve YouTube-ta Suspilne Qırım haberlerine abune oluñız
