"Serbest Qırımğa mektüpler" teşebbüsi çerçivesinde yırcı Valeriy Harçışın 2022 senesi ruslar tarafından qanunsız şekilde sert rejimge 13 yılğa ve 500 biñ ruble para cezasına mahküm etilgen qırımtatar faalcisi ve siyasiy mabüsi Aziz Ahtemniñ mektübini oqudı.
Ukrayina Prezidentiniñ Qırımdaki Temsilciligi bunı bildirdi.
"Şimdi Aziz Ahtem Altay ülkesiniñ Rubtsovsk şeerindeki 10-nci apishanesinde ceza çeke. Siyasiy mabüsniñ aş, açıq avada yürmek ve qorantasınen bağ tutmaq imkânları pek sıñırlana. Halqara toplulıq, şu cümleden uquq qorçalayıcı teşkilâtlar, Avropa Birligi ve AQŞ, onıñ davasını siyasiy sebeplerden yapılğan dep tanıdı", — dep aytıla haberde.
Hatırlatamız ki, "Serbest Qırımğa mektüpler" teşebbüsi Rusiye apishanelerinde qanunsız tutulğan Kreml mabüslerine yazılğan 221 mektüp topladı. Olarnı Viyanada Ukrayina Prezidentiniñ halqara teşkilâtlar yanındaki Temsilciligi tarafından teşkil etilgen tedbirler devamında ketirdiler.
"Serbest Qırımğa mektüpler" aktsiyası 2023 senesi çiçek ayında başlandı. 2024 senesi devamında ukrayinler ve çetelde yaşağan Ukrayina dostları 1800-den çoq destek mektübini yazdı. Teşebbüs Ukrayina Prezidentiniñ Qırım Muhtar Cumhuriyetindeki Temsilciligi, PEN Ukrayine, ZMINA İnsan aqları merkezi, Crimea Daily, QırımSOS, Qırım esnası ve diger ortaqlarnıñ umumiy ğayretleri sayesinde kerçekleştirile.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
