İşğalciler tarafından Hizb ut-Tahrir davasında iştirak etkeni içün 16 yıl ve 9 ayğa mahküm etilgen Enver Mamutovnı Stavropol ülkesiniñ 11-nci tüzetüv müstemlekesinden Çuvaş Cumhuriyetiniñ 3-nci müstemlekesine avuştırdılar.
Onıñ apayı Aliye Abselâmova "Qırım birdemligi"ne bunı bildirdi.
Qadınnıñ aytqanına köre, mayısnıñ başında aqayı beş kün ceza izolâtorında (ŞİZO) bulundı.
"Mayısnıñ 5-nde Enver Mamutov çıqıp, qorantasına mayısnıñ 7-nde onı kene ŞİZOğa yollamaq kerekler, dep bildirdi. Mayısnıñ 6-nda apayınıñ ricasınen advokat Mamutovnı ziyaret etmege tırıştı, amma onı miting keçirgeninde qabaatlap, yibermediler. Aynı şu künü siyasiy mabüs apayına telefon etip, onı başqa müstemlekege avuştıralar, dep bildirdi", — dep "Qırım birdemligi"niñ haberinde bildirildi.
Advokat etaptan evel Enver Mamutovnen körüşti. O, qırımtatar köçürilgeni aqqında malümatnı tasdıqladı, lâkin sebepleri ve soñki noqtası belli degil edi.
Aliye Abselâmova aqayından telefonlar ala edi: mayısnıñ 20-nde — Volgograddan, mayısnıñ 24-nde — Tataristandan ve ilk yaz ayınıñ 6-nda — Çuvaşistandan. İlk yaz ayınıñ 13-nde Enver Mamutov qorantasına Çuvaş Cumhuriyeti boyunca Rusiye FCHniñ idaresiniñ TMtüzetüv müstemlekesi-3nde karantini yekünlengenini bildirdi.
"Hizb ut-Tahrir davası"nıñ birinci Bağçasaray gruppası aqqında ne bilemiz
2016 senesi mayısnıñ 12-nde işğal etilgen Qırımnıñ Bağçasaray şeerinde tintüvler neticesinde dört qırımtatar tutuldı. Aşçı Remzi Memetov, iş adamı Enver Mamutov, tiş ekimi Zevri Abseitov ve terciman Rustem Abiltarov Rusiye Cinayet qanunnamesiniñ 205.5-nci "terror teşkilâtınıñ faaliyetinde iştirak etüv" maddesine binaen qabaatlandı.
2018 senesi ilk qış ayınıñ 24-nde Cenübiy bölgeniñ arbiy makemesi Remzi Memetov, Rustem Abiltarov ve Zevri Abseitovnı 9 senege üküm etti. Enver Mamutovğa 17 yıl apis cezası berildi. 2019 senesi oraq ayınıñ 11-nde Rusiye Yuqarı makemesi ükümni yımşatıp, dörtüniñ apis cezasını üç ayğa qısqarttı.
2019 senesi oraq ayınıñ 18-nde Avropa parlamenti Rusiyeni bütün ukrain siyasiy mabüslerini, şu cümleden bu cinaiy davanıñ mabüslerini azat etmege çağıruvnen rezolütsiya qabul etti.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
