"Qırım.Aqiqat" leyhasınıñ mühbiri Vladıslav Yesıpenko, 4 yıldan ziyade Rusiye apishanesinde yatqan soñ, işğalli Qırım mahkemesi tarafından oña qanunsız şekilde çıqarılğan apis cezasını tolusınen çekip azat etildi.
"Qırım.Aqiqat" ("Radio Svoboda") leyhasınıñ reberi Volodımır Prıtula Suspilneniñ canlı yayınında Qırım jurnalisti Vladıslav Yesıpenkniñ Rusiye apishanesinden azat etilüviniñ tafsilâtları ve şaraiti aqqında tarif etti.
Onıñ aytqanına köre, "Qırım.Aqiqat" leyhasınıñ jurnalisti işğalli akimiyet tarafından oña çıqarılğan bütün "ceza"nı tolusınen çekti. O, şartlı olaraq azatlıqqa çıqmaq aqqına malik edi, lâkin Rusiye onı SİZOda bulunğan müddetine qadar apiste tuta edi.
"O, cezanı başından soñuna keçirdi. Rusiye akimiyeti onı şartlı olaraq azat etmedi, lâkin onıñ bu aqqı bar edi. O çıqqan soñ, Vladnıñ Rusiye sıñırlarından tış çıqması içün, "Radio Svoboda", halqara uquq qorçalayıcı teşkilâtlar, AQŞ ve Ukrayina ükümetleriniñ bütün resursları celp etildi", — dep Suspilneniñ canlı yayında Volodımır Prıtula ayttı.
Bundan da ğayrı, "Qırım.Aqiqat"nıñ yolbaşçısı, Vladıslav Yesıpenko bir qaç tranzit memleketi boyunca Rusiye Federatsiyasından çıqıp, tek aqşam, ilk yaz ayonıñ 22-nde, Pragağa keldi, anda tibbiy teşkerüv ve reabilitatsiya keçecek. Anda onı apayı ve qızı bekley edi.
Volodımır Prıtulanıñ aytqanına köre, şimdilik Rusiye apishanelerinde tahminen yigirmi jurnalist buluna, olarnıñ arasında "Qırım.Aqiqat" leyhasınıñ diger hadimleri de bar.
"Rusiye ukrayin mabüslerini, şu cümleden Qırımdaki jurnalistlerni siyasiy maqsatları içün qullana. Bu raqam ep arta, şimdi Rusiye apishanelerinde tahminen 20 jurnalist buluna", — dep Volodımır Prıtula qoştı.
Hatırlatamız ki, Vladıslav Yesıpenko 4 yıldan ziyade Rusiye apishanesinde bulundı. O, içtimaiy ve ekologik meselelerni aydınlattı, Qırım sakinleriniñ soravlarını çıqardı. 2021 senesi sabannıñ 10-nda işğal etilgen Qırımda Rusiye FSBsi tarafından Ukrayina faydasına casuslıq yapqanında ve maşnada "öz başına yapılğan patlayıcı cihaz" saqlağanında qabaatlanıp tutuldı.
2022 senesi kiçik qış ayınıñ 16-nda İşğalli Simferopol (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) rayon mahkemesi Yesıpenkoğa umumiy rejimli müstemlekede altı yıl apis cezasını ve 110 biñ rublelik (39 600 ğrıvnâ) para cezasını berdi. 2022 senesi arman ayınıñ 18-nde İşğalli Qırım Yuqarı mahkemesi istinafda serbest jurnalistniñ apis cezasını bir yılğa qısqarttı.
"Radio Vilna Yevropa/Radio Svoboda" prezidenti ve baş müdiri Stiven Kapus, Yesıpenko azat etilgen soñ bergen izaatında, Rusiye apishanesinde işkencege oğrağanını bildirdi.
Vladıslav Yesıpenko aqqında ne bilemiz
Vladıslav Yesıpenko - "Qırım.Aqiqat"nıñ "Radio Svoboda" leyhasınıñ jurnalisti. O, içtimaiy ve ekologik meselelerni aydınlattı, qırımlılarnıñ soravlarını çıqardı. 2021 senesi saban ayınıñ 10-nda işğal etilgen Qırımda Rusiye FSB tarafından Ukraina faydasına casuslıq yapqanında ve maşnasında "öz başına yapılğan patlayıcı alet" saqlağanında qabaatlanıp tutuldı.
Mustaqil advokatnıñ kirgeni Aqmescit "makemesi"niñ oturışında, o, Rusiye mahsus hızmetleri tarafından işkencege oğratılğanını bildirdi.
"Gratı" neşiriniñ baş muarriri Anton Naumlük ukrain jurnalisti Yesıpenkonıñ elektriknen işkencege oğratılğanını bildirdi.
2022 senesi kiçik aynıñ 16-nda işğalli Aqmescit rayon makemesi Yesıpenkoğa umumiy rejimli müstemekede altı yıl apis cezasını ve 110 biñ rublelik (39 600 ğrıvnâ) para cezasını berdi.
2022 senesi arman ayınıñ 18-nde Qırımnıñ işğalli Yuqarı makemesi apellâtsiya şikâyetinde serbest jurnalistniñ apis cezasını bir yılğa qısqarttı.
Şimdi Vladıslav Yesıpenko umumiy rejimli müstemlekede 5 yıllıq apis cezasını çeke.
Rusiyeniñ Ukrainağa istilâsı başlağan soñ, Qırımdaki Rusiye müstemlekesiniñ hadimleri, "patlayıcı alet saqlağanı ve taşığanı" içün qanunsız olaraq maküm etilgen jurnalist Vladıslav Yesıpenkonen alâqalarnı sıñırlaylar.
Bundan da ğayrı, Keriçniñ 2-nci apishanesinde tolu miqyaslı istilâ başlağan soñ Yesıpenkonıñ areket tarzı ve sözleri diqqatnen közetile. Aman-aman er afta apishaneniñ "memuriyeti" tarafından çağırıla ve advokat ve qorantasına bir şey aytmamağa tevsiye etile.
2024 senesi orta küz ayında halq mevusı Yaroslav Yurçışın bildirdi ki, Vladıslav Yesıpenkonı ekinci apis müddetine azırlamağa tırışalar.
O yıl orta küz ayınıñ soñunda siyasiy mabüsniñ apayı Katerına Yesıpenko, aqayı Vladıslavğa qarşı ahlâqiy basqı quvetleşkenini bildirdi. Sıñırcı, onıñ ruhiy alına tesir etken şaraitte buluna.
2024 senesi boş aynıñ soñunda Freedom Now uquq qorçayıcı teşkilâtı, Volodımır Yesıpenkonıñ davası boyunca sebepsiz apiske alınuv meseleleri boyunca Birleşken Milletlerniñ İşçi gruppasına muracaat etti. Vesiqada onıñ Qırımda zenaat vazifelerini eda etüvinen bağlı aqlarınıñ bozuluvı qayd etile.
Telegram, WhatsApp, Facebook, TikTok ve YouTubede Suspilne Qıım haberlerine abune oluñız
