Felemenk temsilcileri palatası 1944 senesi qırımtatar halqınıñ sürgünligini genotsid olaraq tanıdı. Qarar ilk yaz ayınıñ 19-nda qabul etildi.
Malümat Felemenk parlamentiniñ saytında yayınlandı. Bundan ğayrı, X ağında Ukrayina tış işler naziri Andriy Sıbiğa bunı bildirdi.
"Bu, Rusiye tarafından Ukrayinanıñ Qırım yarımadasınıñ vaqtınca işğali şaraitinde alâ daa taqip etilgen qırımtatar halqınen küçlü birdemlik numayışıdır. Bu tarihiy adaletsizlikniñ tanılması tek aqiqat ve adaletniñ tiklenmesi içün degil, kelecekte cinayetlerniñ ögüni almaq içün de pek müimdir", — dep aytıla haberde.
Felemenk parlamentçilerine Qırımtatar Milliy Meclisiniñ reisi Refat Çubarov da teşekkür bildirdi.
"Felemenk, qırımtatar halqınıñ zorbalıq sürgünligini genotsid olaraq tanığan sekizinci devlet oldı. Er yıl mahsus muracaatlarnı qabul etken Ukrayina Yuqarı Şurasına minnetdarmız, anda diger memleketlerniñ parlamentleri ve ükümetleri qırımtatar halqınıñ sürgünligini genotsid olaraq tanımağa çağıralar. Bütün ğayretlerini köstergen Ukrayina Tış işler nazirliginiñ reberligi ve hadimlerine minnetdarmız", — dep o Facebookta yazdı.
Hatırlatamız ki, 1944 senesi qırımtatarlarnıñ sürgünligi Ukrayina, Litvaniya, Latviya, Kanada, Poloniya, Estoniya ve Çehiya parlamentleri tarafından genotsid olaraq tanıldı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
