Pilotlarnıñ laflarında "Men oynayım" "raketalardan manevr yapam" manasına kele. Bu, elâk olğan Ukrayina Qahramanı, Qırımdan uçucı Denıs Vasılükniñ (lâğabı "Flash") soñki sözlerini onıñ apayı Vladıslava eşitti. 2024 senesi mayısnıñ 17-nde Harkiv yönelişinde ava uruşında elâk oldı.
Onıñ apayı Vladıslava Suspilne Qırımğa bergeni intervyuda nasıl tanışqanı, beraber yaşağanı, soñki telefon etüvi ve aqayınıñ arzusı — azat etilgen Qırım üzerinde uçmaq aqqında tarif etti.
2016 senesi olar tanış oldılar. Vladıslavanıñ aytqanına köre, birinci körüşüvden başlap olarnı birleştirecek şey, oyun sevgisi oldı. O, aqayı sekiz yıl devamında bal oyunlarınen oğraşqanını hatırlay.
"Bu, ilk baqıştan sevgi edi. Bir saatten soñ, o, meni soqaqlarda vals oynamağa ögretti. Men beceremedim, amma keyfim yahşı edi. Ve o meni ögretti. Em de oyun sanki, bütün ayatınen bağlı edi. Çünki o, sekiz yıl devamında bal oyunlarınen oğraşa edi. Biz oynamağa seve edik", — dep Vladıslava hatırlay.
Denıs, çift tanış olğanda, baş leytenant edi. Denıs Vasılükniñ istilâdan evel cenk tecribesi bar edi. 2014 senesinden başlap o, arbiy vazifelerge uçtı, soñra ise L-39 uçağından Su-27 qırıcı uçağına keçti.
"Denıs 2014 senesinden berli uçucı olıp çalışa ve o vaqıt bile cenk vazifelerini eda ete edi. Yani, o cenk veteranıdır. 2021 senesi biz beraber daa çoq vaqıt keçirmege, aile qurmağa, balalar doğurmağa qarar aldıq. Onıñ kontraktı bitti ve o, işten boşadı. Ve tam olaraq yarım yıl "azatlığımız"nı yaşadıq. Yani, bilemiz, niayet, bizim yaşayışımız böyle edi. İşte böyle. Tolu miqyaslı istilâ başlağan soñ, o, qardaşlarına qaytmağa qarar berdi", — dep Vladıslava tarif etti.
Vladıslava hatırladı ki, Denısnıñ ayatında "17" raqamınıñ ayrı manası bar edi. O, 1993 senesi qara qış ayınıñ 17-nde Qırımnıñ Canköy şeerinde doğdı. Aynıñ 17-nde olar evlendiler. 2024 senesi mayısnın 17-nde daa bir arbiy maqsatnen uçaqanda onıñ uçağı raketa tarafından tüşürildi. Bundan evel uçucı radio bağı vastasınen şunı ayttı: "Men oynayım". Uçucı laflarında bu, manevr ve raketadan qaçuv manasına kele.
Onıñ ölümi aqqında Denısnıñ komandanından telefon vastasınen ögrendi.
"Denıs Vasılük cenk vazifesi vaqtında elâk oldı. O, soñuna qadar küreşti, soñki nefesine qadar küreşti ve vazifeni soñuna qadar bitirdi", — dep Vladıslava hatırladı.
Uçucı elâk olğan künü qorantası Denısnıñ anasınıñ yubileyini qayd etmege azırlana edi. Vladıslava hatırladı ki, aqayınıñ anasınen telefon subeti onıñ içün eñ zor anlardan biri oldı.
"Men telefon ettim, o da “Allo“ dedi. O, Denısnen men onı hayırlamağa istegenimizni bekley. Men de: "Denıs artıq yoq" dedim. O da: "Ne demek, yoq? Men inanmayım". Men ömrümniñ soñuna qadar onıñ bağırğanını hatırlaycağım. Soñra Denısnıñ babası telefonını aldı, o da inanmadı, ve şunı dedi: "Vlada, yalan aytasıñ, böyle olamaz", — dep Vladıslava ayttı.
Ertesi saba o, aq qazanğanı kibi, aqayını ürmetnen añıp defn etmege qarar aldı.
"Men, onıñ eñ sevimli, körmege sevgeni anterimni kiydim. Qırmızı dudaq boyasını qullandım, şaçlarımnı quvurçıq yaptım. Çünki o, bunı ister edi. Menim içün bu ürmet edi — onıñ hanımı, zabitniñ apayı olaraq onı añıp defn etmek kerek edim", — dep Vladıslava añlattı.
Aqayı ölgen soñ Vladıslava, beraber ziyaret etkenleri yerlerge ketti. Bu, onıñ derdini başından keçirvniñ ayrı qısmıdır, dep ayttı.
"Bizim beraber olğanımız bütün yerlerni ziyaret ettim. "Açuvlanmaq içün degil de, yürgenimiz, qol tutqanımız, sarılğanımız yollarda yürmek içün", — dep ayttı o.
Amma Mırğoroddaki kira evinden çıqıp olamay. Bir vaqıtları beraber planlaştırğanları kibi, Kıyivge köçmege planlaştıra.
"Kıyivge köçkende, biz er vaqıt Podil ve Hreşçatikke bara edik. Bular bizim içün eñ yahşı eki yer edi. Bu yerde, Podilde, biz birinci kere samokat aydamağa sınadıq. Şimdi hatırlayım, ve bu pek balaca edi. Menim içün bu pek quvançlı bir hatıra".
Denıs ve Vladıslavanıñ beraber ömürge keçirmegen çoq hayali qaldı. Olardan biri çiftlik tatuları edi.
"Denıs onı 2024 senesi saban ayında yaptırdı. Sağ qolunda büyük bir qanat bar. O ölgen soñ men de aynısını yaptırdım — sol qolumda. Biz soqaqlarda qol tutıp yürmege istey edik", — dep Vladıslava ayttı.
Benısnıñ daa bir hayali — evge, Qırımğa qaytmaq edi. Vladıslava añlattı ki, aqayı Qara deñizniñ yalısında bahtlı babalığını er vaqıt hatırlay edi.
"Onıñ bir hayali bar edi, men bunı pek yahşı hatırlayım — azat etilgen Canköy üzerinde uçmağa ve qanatını sallamağa. Dostlarına, ailesine sallamağa. Bu, onıñ hayali edi", — dep elâk olğan uçucınıñ apayı añlattı.
Keçken sene arman ayında Denıs ölümden soñ Ukrayina Qahramanı unvanını aldı. Vladıslava prezidentniñ elinde "Altın yıldız"nı aldı. O, Denısnı tek uçucı olaraq hatırmamalarını istey. Samimiyetnen yaşağan, samimiyetnen sevgen ve soñ nefesine qadar Ukrayina içün küreşken adam olaraq onı hatırlamalarını istey. Onıñ aqqında dünyağa añlatmaq — endi onıñ missiyasıdır, dep ayttı o.
"Bu menim ikâyem, bu menim sevgim, ve bu er vaqıt mennen olacaq, ve bu acı er vaqıt mennen olacaq. Bilesiñizdir, qan ketken yara, yara izine çevirile", — dep Vladıslava hulâsa çıqardı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
