2025 senesi bozarğan aynıñ 17-nde Ukrayina tarafı işğal etilgen Qırımda yerleşken bölüklerden eñ az 2020 Rusiye arbiyi elâk olğanını tasdıqladı. Olardan 1306-sı — Ukrayina vatandaşıdır.
Ukrayina prezidentiniñ Qırım MCdeki temsilciligi bu aqqında haber berdi.
Keçken afta bu raqam daa az edi: Qırımda yerleştirilgen bölüklerden 1955 Rusiye arbiyi elâk oldı (bir aftada 65 elâk oldı). Olardan 1296-sı (bir afta içinde daa 10 adam elâk oldı) Ukrayina vatandaşı ola bile.
Bundan da ğayrı, Qırımdan eñ az 119 Rusiye arbiyi esir alınğanı tasdıqlandı. Çoqusı Ukrayina vatandaşları ola bile.
Hatırlatamız ki, IV Jeneva şartnamesiniñ 51-inci maddesi işğalci devletke işğal altındaki ealini orduda hızmet etmege mecbur etmege yasaq ete. Bu arbiy cinayet sayıla.
Ukrayina prezidentiniñ Qırımdaki temsilciligi, Rusiye studentler arasında zorbalıq mobilizatsiyasını quvetleştirgenini de bildirdi.
"V.İ. Vernadskıy adına Qırım federal universitetinde tasil şantajınen mecburiy mobilizatsiya mehanizmi işke tüşürildi — akademik muvafaqiyetini nezaret etüv adı altında üç ya da daa çoq imtian berilmegen talebeler aqqında malümat toplanıla, bu ise avtomatik şekilde universitetten çıqarıluvına ketire. Universitetten çıqarılğan talebeler işğal ordusınıñ arbiy komissarlıqlarına ketirile, anda olarnı er angi vaqıtta askerlikke çağıra bileler", — dep haberde qayd etildi.
Hatırlatamız ki, 2025 senesinden başlap Rusiye arbiy komissarlıqları askerlikke çağıruvname alğan soñ er angi vaqıtta askerlerni yollay bileler, dep "Sarı şerit" areketi yazdı. Yani, eger adamnı baar çağıruvı vaqtında çağırğan olsalar, onı, küz çağıruvı içün yañı arizanı yazmayıp, baar çağıruvı bitken soñ da mobilizatsiya ete bileler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
