İşğalli Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) memuriyeti mektep talebeleri içün "emek semestri"ni kirsetti. Balalar yaz tatiliniñ yerine kommunal obyektlerde, hususan qurucılıqta çalışmağa mecbur etile.
Ukrayina prezidentiniñ Qırımdaki temsilciligi bunı bildirdi.
"İşçilik terbiyesi" altında bala işiniñ istismarı kerçekten yapıla, "gubernatorlıq mektep emek gruppaları" ise bu yanaşuvnıñ aletlerinden biri oldı. "Otrâd"larda iştirak etmek içün alternativ olaraq Rusiyege teşviqat seyaatları teklif etile", — dep aytıla haberde.
Hatırlatamız ki, evel Milliy muqavemet merkezi işğal etilgen Qırımda arbiy mekteplerge studentlerni "grant leyhaları"nda iştirak etmek içün arbiy aliy oquv yurtlarına celp etkenlerini bildirdi. Hususan, biñden çoq adam "taktik tibbiyet dersleri"ne qoşuldı: olar Rusiye arbiyleri içün ilâclarnı azırlaylar.
"Daa tahminen 800 talebe Simferopoldaki bala bağçalarını Vladimir Putinniñ resimleri, Rusiye Silâlı quvetleriniñ timsalleri ve arbiy areketlerniñ sanalarınen boyalamağa mecbur eteler — "göñülli faaliyet" olaraq", — dep aytıla haberde.
RİA "Novosti Krım" neşiriniñ Qırımdaki "Halq cebesi" Rusiye teşkilâtınıñ "icra eyyetiniñ yolbaşçısı" Alla Vertinskayanıñ bildirgenine köre, işğalli Qırım akimiyeti studentlerni "gumanitar vazifelerinen" arbiy areketler alanına yollay. Eki buçuq yıl içinde Zaporijjâ, Herson, Donetsk ve Luğansk vilâyetleriniñ işğal etilgen topraqlarına, em de Rusiyeniñ Kursk ve Belgorod vilâyetlerine eñ azından on sefer yapıldı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
