Keçken afta Rusiye quvetçileri işğal etilgen Sevastopolnıñ (Aqyarnıñ) çarşılarından birini tintip, erkeklerniñ vesiqalarını teşkerdiler — em satıcılar, em de alıcılar arasında. İşğal etilgen Qırımdan 13 adam, işğalli arbiy komisarlıqqa çağıruvnameni aldı.
Ukrayina prezidentiniñ Qırım Muhtar Cumhuriyetindeki temsilciliginiñ 2025 senesi bozarğannıñ 9-nda çıqqan maruzasında bu aqında aytıla.
"Sevastopol çarşısında keçirilgen tintüv vaqtında esas diqqat arbiy cedvelge alındı: anda olmağan 13 insanğa işğalcilerniñ arbiy komissarlığına kelmek mecburiyetinen çağıruvname berildi", — dep aytıla haberde.
İşğal etilgen Qırımda bu kibi teşkerüvler sıq-sıq keçirile ve tek çarşılarnı degil de, qurucılıq meydançıqlarını, musafirhanelerni, klublarnı, parklarnı ve insanlar toplaşqan diger yerlerni de qaplap ala.
Keçken afta devamında işğal etilgen Qırımda "RF Silâlı quvetlerini itibardan tüşürüvRF CMQniñ 20.3.3-nci maddesi" maddesine binaen davalarnıñ sayısı arttı: 1382 adise qayd etildi, keçken afta ise 1350 adise bar edi. 1218 davasında para cezaları ya da davalarnı birleştirüv qararları çıqarıldı. 61 davanıñ baqılması devam ete. Qararlarnıñ 49%-i (597) qadınlarğa, 51%-i (620) ise erkeklerge qarşı açıldı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
