Bozarğan aynıñ 4-nci sabası Rusiye eki gemisini — umumen 12 "Kalibr" qanatlı raketasınıñ taşıyıcısı olğan eki gemisini — Qara deñizge arbiy hızmetke yolladı. Azaq deñizde ise Rusiye gemileri qayd etilmedi.
Ukraina SQniñ Arbiy-deñiz quvetleriniñ matbuat hızmeti Facebookta bunı bildirdi.
Aynı zamanda Aq deñizde ise üç Rusiye gemisi bar, olardan biri — umumen sekiz "Kalibr" qanatlı raketasınıñ taşıyıcısıdır.
Bundan ğayrı, keçken künü Rusiye Federatsiyasınıñ menfaatları içün Keriç boğazından Azaq deñizine eki gemi keçti, olardan biri İstanbul boğazına areket etti. Keriç boğazından Qara deñizge ise beş gemi keçti, olardan dörtü İstanbul boğazına areket etti.
"Rusiye, avtomatik identifikatsiya sistemasını (AIS) söndürerek, 1974 senesiniñ Deñizde insan ayatınıñ qoruvı aqqında halqara şartnamesini (SOLAS) bozmağa devam ete", — dep qayd etildi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
