On bir yıl evelsi, 2014 senesi mayısnıñ 30-nda, işğal etilgen Qırımda "Ukrayina evi"niñ faalcisi Seyran Zinedinov ğayıp oldı. Onıñ bulunğan yeri alâ daa belli degil.
"Qırımtatar maaliy merkezi" (QMM) bunı bildirdi.
"O, daa evel ğayıp olğan Timur Şaymardanov ve Leonid Korjnı qıdırğan edi. 2014 senesi mayısnıñ 30-nda aqşam Seyran Zinedinov Timur Şaymardanovnıñ ömür arqadaşınen körüşip, Timur "Qırım öz-özüni mudafaa etüvi" yanında olğanını tahmin etken edi, amma körüşüvden soñ evge qaytmadı", — dep aytıla haberde.
İşğal etilgen Qırımda ve qıtaiy Ukrayinada ğayıp olğanı sebebinden cinaiy davalar açıldı.
Qırım Cumhuriyetindeki Rusiye Tahqiqat eyyetiniñ işğalli tahqiqat idaresi Rusiye Ceza qanunnamesiniñ 105-inci maddesiniñ 1-inci qısmında (öldürüv) qayd etilgen cinayet alâmetleri boyunca cinaiy dava açtı. Lâkin "tahqiqat"nıñ neticeleri yoq, dep QMM qayd etti.
Hatırlatamız ki, "QIrımSOS" cemaat teşkilâtınıñ malümatına köre, mayıs ayına qadar Qırım toprağında eñ az 66 zorbalıqnen ğayıp oluv adisesi qayd etildi, olarnıñ çoqusı — qırımtatarlarğa qarşı. Birleşken Milletler Teşkilâtınıñ insan aqları Yuqarı komissarınıñ ofisi keçken sene 100-den çoq böyle vaqia aqqında malümat berdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
