Bulğaristanda, Tsarev Brod köyünde, Şumen cemiyetinde, qırımtatarlarğa bağışlanğan "Açılış. Bulğaristan klasteri" adlı sergi açıldı. Tedbir "Qırımtatar studiyaları" halqara tasil medeniy-bediiy leyhası çerçivesinde keçirile ve Qırımnıñ tamır halqınıñ medeniyeti aqqında tarif ete.
Facebook saifesinde teşkilâtçı Valeriya Levkivska bu aqqında yazdı.
"Bizim ortaq ğayretlerimiznen unikal sergi yaratıldı. O, qoqla kompozitsiyalarını, qırımtatar, ukrayin ve bulğar genç ressamlarınıñ resimlerini, em de Tsarev Brod ve Makak köyleriniñ Qırım cemiyetiniñ, Şumen cemiyetiniñ artefaktlarını birleştirdi", — dep Valeriya Levkivska tarif etti.
Qırımtatar Milliy Meclisiniñ reisi Refat Çubarov, kelecek sene endi bütün Bulğaristan miqyasında yañı medeniy-maarif qırımtatar leyhalarını teşkil etmege planlaştırılğanını bildirdi.
"İki yıldır, Bulğaristandaki qırımtatar diasporasınıñ tarihı ve zemaneviy vaziyetini aydınlatqan yerli leyhalar muvafaqiyetnen devam ete. Eminim, 2026 senesine bütün Bulğaristan miqyasında qırımtatar medeniy-maarif leyhalarına azırlanmağa vaqıt keldi", — dep Refat Çubarov qayd etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
