2024 senesi uvut ayında feldşer Tamara Çernuha, işğal etilgen Qırımda ğayıp oldı. Yerli sakinlerniñ aytqanlarına köre, onı işğalci FTH vekilleri "satqınlıq"-ta qabaatlap tutqanlar. O vaqıttan berli qadınnıñ qayda olğanı resmiy sürette tasdıqlanmadı, qorantanıñ oña daa irişmesi ve onıñ alına dair malümat yoq.
Bu aqta Qırımnıñ reintegratsiya assotsiatsiyası haber ete.
Çernuhanıñ ğayıp olğanı aqqında qorantası birden bilmedi. Qadınnıñ yoqluğından havflı olğan soy-sopları onıñ yaşağan yerini teşkermek ricasınen işğalci miliske muracaat eteler. Kvartiranı teftiş etüv vaqtında uquq qorçalav organlarınıñ hadimlerine "idare" tarafından teftişni toqtatmaqnı talap etip, telefon açılğan.
Soy-soplarnıñ işğal qurumlarına – prokuraturağa, miliske, FTH-neye – çoqtan-çoq muracaatlarına baqmadan, olarğa tek Çernuhanıñ tutuv yerlerinde olmaması ve cinaiy işniñ açılmaması aqqında resmiy mektüpler keldi.
Aynı vaqıtta, iş arqadaşları ve köy sakinleriniñ vastası ile qoranta Tamara Çernuhanıñ "satqınlıqta" qabaatlanıp, "izolâtor"-da tutulğanını bildi. Aynı şu malümatnı işğalci milisniñ bazı vekilleri de gizliden tasdıqladılar.
Birleşme Tamara Çernuhanıñ sağlıq alı ciddiy havflılıq doğurğanını qayd etti. Soy-sopları oña ilâc ve aş bermege ruhset bermeyler. Onı etraftaki müitinden tış ve bağsız ve kerekli tibbiy yardımsız tutmaq azapnıñ bir çeşiti sayılmaqtadır.
İnsan aqları qorçalayıcıları Çernuhanıñ işinde zorlap ğayıp etilmek ve IV Jeneva konventsiyasını ciddiy bozmaqnıñ bütün alâmetleri olğanını idda eteler. Bu iş aqqında malümat endi BMT, TİAB, Halqara Qızıl Haç komitetine ve Ukraina ombudsmenine yollanıldı. Bu iş, TİAB-niñ insan aqları tedbirlerinde de añıldı.
Telegram, WhatsApp ve Facebookta Suspilne Qırım haberlerine abune oluñız
