Qırımtatar halqnıñ Meclis prezidiumı, Özbekistan akimiyetini Taşkent ve Samarqandta 2025 senesi mayısnıñ 28-den kiraz aynıñ 2-ne qadar keçirilecek Rus medeniyeti künlerinde Qırımnıñ işğalci idaresi vekillerini kirsetmemege çağırğan. Meclisniñ malümatına köre, RF, halqara medeniy tedbirlerniñ vastası ile Qırımnıñ işğalini qanunileştirmege tırışa.
Bu aqta Qırımtatar halqınıñ Meclisiniñ resmiy beyanatında da aytıla.
Qırımtatar halqnıñ Meclisi, Özbekistan Cumhuriyetinde Rus medeniyeti künleri çerçivesinde "Qırım akimiyetiniñ" vekilleriniñ planlaştırılğan iştirağı aqqında beyanatlar sebebinden büyük raatsızlığını bildirgen.
Açıq menbalardan alınğan malümatına köre, Rusiye vekilleriniñ terkibinde qanunsız işğal idaresinden şahıslar, olarnıñ arasında Ğeorğiy Muradov, Ravşan Yakubov, Çınğiz Yakubov, em de işğal akimiyeti tarafından nezaret etilgen medeniy müessiselerniñ vekilleri bar.
Tedbirlerniñ programmasına köre, Özbekistandaki qırımtatarlar aqqında almanahnıñ taqdim etilmesi, abideniñ taslağı, "Qırım filarmoniyası sanatkârlarnıñ" kontserti, em de Qırım ve Taşkentteki müessiseler arasında añlaşma imzalanması beklenile.
Meclisniñ Prezidiumı, böyle iştirağını Rusiye Federatsiyası tarafından işğal rejimini halqara cemiyetine qanuniy akimiyeti olaraq taqdim etmege ıntıluvı olğanını saya.
"Qırımnıñ işğalci idaresi vekillerinen er angi resmiy ya da resmiy olmağan alâqalar, ve daa ziyade olarnıñ Özbekistan serbest devletiniñ territoriyasında keçirilgen tedbirlerde iştirak etmesi, elbet de, Rusiye Federatsiyası tarafından Qırımnıñ zapt etüviniñ tanılması olaraq añlatılacaq", — bildirdiler qırımtatar halqnıñ Meclisiniñ Prezidiumında.
Telegram, WhatsApp ve Facebookta Suspilne Qırım haberlerine abune oluñız
