İşğal etilgen Qırımda ukrayin tili tasilden aman-aman bütünley çıqarıldı. İşğalli akimiyetniñ ukrayin tilli mektebi aqqında bildirüvine baqmadan, talebelerniñ ukrayin tilinde derslikleri yoq, imtianlarnı ise rus tilinde bermek mecburlar. Qırımtatar tilinen de aynı vaziyet — ana-babalarnıñ isteklerine baqmadan, sınıflar açılmay.
Brüsselde Birinci Qırım aftasında uquq qorçalayıcı, "Alemanda" vatandaş maarif merkeziniñ reisi Mariya Sulâlina bunı ayttı, dep ZMINA yazdı.
"İşğalden evel Qırımda ukrayin tili er yerde ögrenile edi, şimdi ise, işğalli akimiyetniñ malümatına köre, bunı teşkermek qıyın — talebelerniñ tek 0,5 fayızı. İşğalciler bir ukrayin mektebi aqqında tarif eteler. Lâkin onı ziyaret etkenler, anda ukrayin tilinde derslikler bile olmağanını, balalar ise bütün imtianlarnı tek rus tilinde bermek kerek olğanını aytalar", — dedi Sulâlina.
Uquq qorçalayıcı şunı da qayd etti ki, işğal etilgen Qırımda qırımtatar tiliniñ vaziyeti daa yahşı degil. Onıñ aytqanına köre, ana-babalar qırımtatar sınıflarını açmaq içün arizalar yazsalar da, mektep memuriyeti bunı yapmağa istemey.
"Bilesiñizdir, sınıfta, meselâ, tek eki qırımtatarı olsa, digerleri qırımtatar tiline degil de, rus tiline rey berecekler", — dep uquq qorçalayıcı añlattı.
Onıñ qayd etkenine köre, ana-babalarnıñ qırımtatar tilinde ders bermege istegenlerini bildirmege resmiy aqqı bar, amma kerçekten de bu mehanizm çalışmay. Ana-babalar muracaat etken soñ, toplu rey berüv keçirile, anda rus tilli çoqluq üstün ola.
Читати ще
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
