Kıyivde ilk sefer milletlerara ahlâq ve medeniy çeşitlik künü qayd etildi. Bu, 2024 senesiniñ soñunda Ukrayina prezidentiniñ fermanınen başlatılğan yañı devlet bayramıdır. Tedbir çerçivesinde Bütünukrayin milliy toplulıqları ve tamır halqları forumı olıp keçti. Milliy azlıqlar temsilcileri Milletlerara razılıq bağçasında ağaçlar ektiler.
Bayramğa Suspilne Qırım mühbiri keldi.
Tamır halqlarınıñ temsilcileri, yekâne ukrayin qorantasına aitlikniñ timsali olaraq ağaçlar ektiler. Qırımtatarlar içün bu alma teregi.
"Royal" alma çeşiti bar. Olar bol bereketli, ve insanlar olarnı begeneler. Amma biz Bağçasaraynı bekleymiz, anda "Kandil"ni ekmege isteymiz. Bu unikal alma çeşiti, onı bütün ömürleri devamında qırımtatarlar yetiştirgen ediler. Onı aman-aman yoq ettiler, amma qırımtatarlar onı saqlaylar", — dep Qırımtatar Milliy Meclisiniñ reisi Refat Çubarov tarif etti.
Künniñ esas tedbiri, Kıyivde onlarnen cemaat temsilcilerini toplağan Bütünukrayin milliy azlıqlar ve tamır halqları forumı oldı. Resmiy qısımdan soñ iştirakçiler milliy oyunlar, türkü, urba ve medeniyetniñ diger unsurlarını taqdim ettiler.
"İnsanlar içün ve insanlar aqqında tedbirlerniñ teşkil etilmesi pek güzel. Qırım Ukrayinanıñ üç tamır halqı, milliy azlıqları içün evdir, ev edi ve qala. Men, Ukrayina vatandaşı olaraq, er kesniñ özü olmaq, öz tilinde laf etmek, öz ananelerini saqlamaq aqqına inanam. Ve tek farqlılıqta serbest olmaq mümkün", — dep Ukrayina prezidentiniñ Qırım Muhtar Cumhuriyetindeki temsilcisi Olğa Kurışko bildirdi.
Soñunda prezidentniñ adından Ukrayina mudafaası içün mukâfatlar berildi — devletniñ mudafaasına milliy cemiyetler vekilleriniñ qoşqan issesine minnetdarlıq olaraq.
"Bugün müim bir kün, dep tüşünem. Bu künni ilk sefer qayd etemiz. Prezident vazifesine tayinlengenine yarım yıldan az vaqıt keçti. Bütün saalarda bizde devletniñ böyle tezligi yoq. Bu pek büyük neticeler. Amma eñ esası — yüreklerimiz bir yüreknen ursın. Şimdi devletimiz ögünde olğan bütün bu çağıruvlarnı biz — ukrayinler ve ukrayin olmağanlar, serbest Ukrayina içün küreşken er kes — beraber yeñemiz", — dep Ukrayina Yuqarı Şurası reisiniñ birinci muavini Oleksandr Korniyenko qayd etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
