İşğalli Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) mahkemesi Rusiye Federatsiyasınıñ Ukrayinağa istilâsına qarşı çıqqan yerli sakinge üküm çıqardı. O, "Ukrayina Mudafaa nazirliginiñ Baş istihbarat idaresinen işbirlik" sebebinden "devlet hainligi"nde qabaatlanıp, sert rejimli müstemlekede 18 yılğa üküm etildi.
İşğalli Qırım Cumhuriyeti prokurorlığı bunı bildirdi.
İşğalli akimiyetniñ versiyasına köre, adam 2024 senesi Ukrayina Mudafaa nazirliginiñ temsilcisinen bağ qurdı ve "çetel istihbaratına yardım etmege" razı oldı. O, "Sevastopoldeki patlayıcı aletlernen saqlanğan yerlerni qıdırıp, olarnı belgilengen yerlerge avuştırmağa tırışqanı"nda iştirak etken.
Prokurorlıqnıñ malümatına köre, FSB adamnı, o vazifeni yerine ketirmezden evel tuttı. Onı apiske aldılar, qapalı şekilde mahkeme keçirdiler ve sert rejimli müstemlekede 18 yılğa, bir buçuq yıl azatlıqtan marum etüvge ve 400 biñ rublelik para cezasına mahküm ettiler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
