Uquq qorçalayıcı ve siyasiy mabüs, qırımtatar Server Mustafayev insan aqları ve demokratiya qorçalavına qoşqan issesinen Freedom House teşkilâtınıñ Alfred Mozes adına Azatlıq mukâfatını aldı.
Freedom Award mukâfatınıñ resmiy saytında bu aqqında haber etildi.
Mustafayev Rusiyede vaqtınca işğal etilgen Qırımda uquq qorçalayıcı ve vatandaş faaliyeti içün 14 yılğa mahküm etildi. O, yarımadada insan aqlarınıñ bozuluvını belgilegen "Qırım birdemligi" teşebbüsiniñ idarecilerinden biridir.
Server Mustafayevniñ adından Vaşingtonda mukâfatnı Ukrayinanıñ AQŞdaki elçisi Oksana Markarova aldı. O, çıqışında Rusiye tarafından qanunsız tutulğan bütün ukrayinalılarğa qol tutmaq müimligini qayd etti.
"Menim içün onıñ adından bu mukâfatnı almaq, Server ve Rusiye tarafından qanunsız tutulğan diger ukrayinalılar aqqında hatırlatmaq büyük şereftir. Bu tanuv, Ukrayina ve qırımtatar halqınıñ Rusiye Federatsiyasınıñ sert repressiyalarına qarşı küreşi aqqında müim hatırlatma ola. Kremlniñ qırımtatarlarğa qarşı cinayetleri ve Ukrayinağa qarşı genotsid cenki — yamanlıq imperiyasınıñ cezasız insan nefret siyasetiniñ, 1944 senesi sürgünliklerniñ ve ukrayinlerge qarşı yapılğan diger cinayetlerniñ devamıdır", — dep yazdı o.
Freedom House — 1941 senesi totalitarlıqqa qarşı küreşte demokratik küçlerni birleştirmek içün teşkil etilgen halqara uquq qorçalayıcı teşkilâtı. Onıñ maqsadı — dünyada demokratiya, insan aqları ve söz serbestligini desteklemek, em de bu degerliklerni basqı şaraitinde qorçalağanlarnı qorçalamaqtır. Er yıl Freedom House, insan aqlarınıñ qorçalavına büyük isse qoşqan şahıs ve teşkilâtlarğa mukâfatlar bere. Evelki laureatlar arasında XIV Dalay Lama, Vinston Çerçill ve Martin Luther King Jr.
Server Mustafayev aqqında ne bilemiz
Server Mustafayev, "Qırım birdemligi" cemaat birleşmesiniñ idarecisidir. Qırım siyasiy mabüsleriniñ ailelerine uquqiy, malümat ve içtimaiy-yaşayış ceetinden yardım ete.
2014 senesinden başlap Mustafayev, Qırımdaki vaziyetni muntazam tarzda nezaret ete be siyasiy sebepli makeme ceryanlarını aydınlata edi.
2018 senesi mayıs ayınıñ 21-inde quvetçiler evlerini tintip, Server Mustafayev ve Edem Smayilovnı tuttılar.
2020 senesi berim ayınıñ 16-sında Rostov-na-Donudaki Cenübiy bölge arbiy makemesinde qırım musulmanını 14 senege maküm ettiler.
Saban ayınıñ 14-ünde Vlasisadaki Apellâtsiya arbiy makemesi, qorçalayıcı tarafnıñ şikâyetnamesini baqıp, qanaatlendirmedi. Umumen dava çerçivesinde 45 makeme oturışı keçirildi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
