Rusiye vaqtınca işğal etilgen Qırımda kolonial siyasetini devam ete, onıñ qavmiy terkibini deñiştire, Qırımtatarlarnı taqip ete ve tamır halqlarınıñ medeniy ve til kimligini maqsatlı şekilde yoq ete.
Ukrayina prezidentiniñ Qırım Muhtar Cumhuriyetindeki daimiy temsilcisi Olğa Kurışko Rusiye Federatsiyası tarafından işğal şaraitinde Qırım yarımadasında milliy azlıqlarğa ait olğan, tamır halqlarınıñ aqlarınıñ bozuluvı aqqında media brifinginde bildirdi.
"Rusiye Federatsiyasınıñ sistematik siyaseti asırlar devamında deñişmegenini qayd ete bilemiz. Bu klassik bir müstemlekecilik strategiyasıdır — Qırımnı sadıq ealinen yerleştirmek. Farqlı tahminlerge köre, yarımadağa bir millionğa qadar rus qanunsız keldi", — dep Olğa Kurışko bildirdi.
Onıñ qayd etkenine köre, bu tek demografik deñişüv degil de, aynı zamanda assimilâtsiya basqısıdır.
"Ana tili ve medeniyetiniñ inkişafı içün şarait yoq. Qırımtatar tili ğayıp olmaq üzre. Ukrayin tili — aman-aman qullanılmaz. Eki halqara mahkeme bu bozuluvlarnı qayd etti", — dep prezidentniñ QMCdeki temsilcisi qayd etti.
Qırım "asimilasiya tehnologiyalarınıñ merkezi" oldı, Rusiye Federatsiyası ise anda tamır halqlarına nisbeten onlarca yıl devamında repressiv modellerni qullanğan edi, dep Ukrayina siyasiy tahqiqatlar mustaqil merkeziniñ şurasınıñ başı Yuliya Tışçenko qayd etti.
"Mında Rusiye sadıq olmağan cemiyetlerni temizlemege tırıştı: temsiliy organlarnı, hususan Meclisni yasaq etti, öz-özüni idare etüvni yoq etti, er şey yahşı olğanını aytqan cemiyetler qurdı", — dep Yuliya Tışçenko qayd etti.
Mütehassısnıñ qayd etkenine köre, resmiy Qırımtatar tili mekteplerinde "tasil işi" "Çehovnıñ doğğan künü" ya da "Qırımnıñ Rusiyege qoşuluvı" kibi künlerniñ qayd etilmesinen yekünlene.
"4-7 sınıf balaları "Rusiye halqına hızmet etem" aktsiyalarına ve çeşit arbiy teşkilâtlarnen körüşüvlerge baralar. Tarihiy hatıra bütünley siline", — dedi Tışçenko.
Bu til ve tasilnen sıñırlanmay. Akimiyet vekilleri siyasiy taqiplerniñ artqanını qayd ettiler:
"Bugün Rusiye Federatsiyası 223 insannı qanunsız alda tuta, olardan 133-ü — Qırımtatardır. Bu qamiy ve siyasiy sebeplerden yapılğan taqiptir", — dep Olğa Kurışko qayd etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
