Kiyevde qırımtatar genotsidiniñ qurbanlarınıñ hatırasını añdılar.Genotsid memorialında keçirilgen merasimde ükümet, diplomatik korpus, halqara teşkilâtlarnıñ vekilleri, em de din ve cemaat erbapları iştirak ettiler.
1944 senesi bir qaç kün içinde sovet akimiyeti, 200 biñge yaqın insannı sürgün etti, dep hatırladı öz çıqışında qırımtatar halqnıñ Meclis, reisi Refat Çubarov.
"Sürgünlikniñ birinci yılları qırımtatar halqınıñ 46% ziyadesi açlıqtan, hastalıqlardan, ağır emekten ve komendant rejiminiñ vahşiy şaraitlerinden elâk oldı. Bugün, genotsidten 81 yıl keçken soñ ve endi 11 yıl 2014 senesi Rusiyeniñ Qırımnı işğal etmesinen başlanğan kollektiv qulluğınıñ yañı dalğasına kirgende, qırımtatarlar kene de basqılar, siyasiy taqip, sürgünlikke ve Qırımnıñ tamır halqına dair genotsid siyasetine oğraylar", – dedi Refat Çubarov.
Şimdi yarımada territoriyasında 223 adam qanunsız tutulmaqta, dep ayrıca qayd etti Ukraina prezidentiniñ Qırımdaki vekili Ölğa Kurışko.
"Biz tış işler nazirliginden kelgen arqadaşlarımıznen beraber "Serbest Qırımğa mektüpler" tedbiriniñ teşebbüsini alıp baramız, onıñ devamında adamlar bizim destegimizni beklegenlerge muracaatlar yazalar. Bütün sınavlarğa baqmadan, qırımtatar halqı, öz tilini ve adetlerini saqlap qaldı", — dedi o.
Qırımda prezidentniñ vekil muavini Ölena Kovalska, qırımtatarlarnıñ sürgün etilmesini genotsid areketi olaraq tanıması, endi dünya içün müim olğanını ayrıca qayd etti.
"Bizim böyle facialarnıñ qaytmasına yol bermege aqqımız yoq. Şunıñ içün Ukraina er bir seviyede - siyasiy, informatsion, halqara - 1944 senesi olğan sürgünlikni genotsid olaraq tanımağa tırışa. Yuqarı Şurası, dünya ükümetlerine ve parlamentlerine bu mevamına qol tutmaq içün muracaat etti. Biz endi uyğun qararnı qabul etken devletlerge ve halqara teşkilâtlarğa — Litvaniya, Latviya, Estoniya, Poloniya, Çehiya, Kanadağa minnetdarmız. Biz bütün dünyanı bu areketke qoşulmağa çağıramız", — dedi o.
Aynı zamanda Refat Çubarov, qırımtatar halqınıñ genotsidini tanıması, tek tarihiy adalet areketi degil de, aynı vaqıtta böyle cinayetlerniñ tekrarlanmamasına sebebi dep, ayrıca qayd etti.
"Hususan şimdi, qırımtatar halqı, onıñ serbestligi ve menligi Qırımda rusiye işğalci akimiyeti tarafından kene de telüke astındadır. Demografiyanı deñiştirmek, Qırımnıñ işğalini közge almamaq ya da deokkupatsiyadan red etmek - o, Rusiyeniñ cinaiy siyasetine yol bermesidir, muvaqqat işğal etilgen territoriyasına qarşı insaniyetlikke yol bermektir ve onı teşviqat etilmesidir, genotsid qurbanlarınıñ hatırasına hainligi ola", - qayd etti Refat Çubarov.
Hatırlatmaq isteymiz ki, mayıs 18 künü Kiyevde qırımtatar halqınıñ genotsidi qurbanlarını añuv künü içün hatıra ve qoltutuv meydanlığı çalışacaq. Tedbirler saat 14:00-den 20:00-ge qadar Genotsid qurbanları memorialında keçirilecek.
Planlaştırılğan tedbirlerniñ programması, Ukraina Prezidentiniñ Qırımdaki vekilligi tarafından derc etildi.
- "Serbest Qırımğa mektüpler" - istegen insan öz ukrain tarafdarlı mevamı, qırımtatarlığı ve Rusiye işğaline qarşı olğanları içün Rusiye tarafından qanunsız tutulğan qırımlı siyasiy mabüslerge destek mektübi yaza bile.
- Memorial yanında malümat montajı - qırımtatar halqınıñ genotsid tarihı ve öz vatanına qaytuv yolu aqqında sergi açılacaq.
- Aqşam saat 20:30-da Qırım yarımadası ve serbestlik, boysunmamazlıq ve itibar timsali olğan qırımtatar tamğası şekilinde şamlar yaqılacaq.
Telegram, WhatsApp ve Facebookta Suspilne Qırım haberlerine abune oluñız
