18 mayıs künü Kiyevde qırımtatar halqınıñ genotsidi qurbanlarını añuv künü içün hatıra ve destek saası keçirilecek. Tedbirler saat 14:00-den 20:00-ge qadar Genotsid qurbanları memorialında keçirilecekler.
Planlaştırılğan tedbirlerniñ programmasını Qırımda Ukraina prezidentiniñ temsilcilligi neşir etken.
- "Serbest Qırımğa mektüpler" – istegen insan öz ukrain tarafdarlı mevamı, qırımtatarlığı ve Rusiye işğaline qarşı olğanları içün Rusiye tarafından qanunsız tutulğan qırımlı siyasiy mabüslerge destek mektübi yaza bile.
- Memorial yanında malümat inşaatı – qırımtatar halqınıñ genotsid tarihı ve öz vatanına qaytuv yolu aqqında sergi açılacaq.
- Aqşam saat 20:30-da Qırım yarımadası ve serbestlik, boysunmamazlıq ve itibar timsali olğan qırımtatar tamğası şekilinde çıraqlar yaqılacaq.
"Er bir çırağınıñ alevi: "Hatırlaymız", — aytacaq. Biz yaqınmız. "Qırım serbest olacaq". Bu areketniñ yarığı tek keçmiş aqqında degil. Ümüt, evge qaytuv yolu, işğal ve basqılardan serbest kelecegi aqqında söz kete", – denile beyanatta.
Hatırlatayıq ki, qırımtatar halqınıñ genotsid qurbanlarını añuv kününe Ukraina territoriyasında yedi biñden ziyade mevzuiy bigbord ve 149 sitilaytı qoyuldı. Hatırlav tedbirleri tek Ukrainada degil de, tış memleketlerde de planlaştırıla: Türkiye, Poloniya, Almaniya, Çehiya, Latviya, Litvaniya, Kanada ve AQŞ-da.
Telegram, WhatsApp ve Facebookta Suspilne Qırım haberlerine abune oluñız
