Ukrayina prezidenti Volodımır Zelenskıy Nariman Celâlnı Türkiye Cumhuriyetindeki Ukrayina Fevqulâde ve Vekâletli Elçisi olaraq tayin etti.
Mütenasip vesiqa Ukrayina prezidentiniñ saytında peyda oldı.
"Celâlov Nariman Enverovıçnı Türkiye Cumhuriyetindeki Ukrayina Fevqulâde ve Vekâletli Elçisi olaraq tayin etmek", — dep aytıla haberde.
Qayd etilmeli ki, tayinlev Ukrayin eyyetiniñ Türkiyege ziyareti ve Rusiye Federatsiyasınıñ Ukrayinağa qarşı açqanı cenkniñ toqtatıluvı boyunca muzakerelerniñ neticesi oldı.
İşbu qararğa Qırımtatar Milliy Meclisiniñ reisi Refat Çubarov da seslendi.
"Ukrayina prezidentine teşekkürler bildirem. Namuslı bir saylav. Hayırlı olsun, Ukrayina Fevqulâde ve Vekâletli Elçisi", — dep Refat Çubarov qayd etti.
Nariman Celâl aqqında ne bilemiz
- 2013 senesinden başlap Nariman Celâl Qırımtatar Milliy Meclisi reisiniñ birinci muavini vazifesini eda etip, haber-analitik bölüginiñ yolbaşçısı oldı.
- 2021 senesi ilk küz ayında Qırımdaki Rusiye işğalcileri tarafından sahte diversiya qabaatlavınen tutulğan edi. 2022 senesi ilk küz ayında Qırımnıñ Yuqarı mahkemesi onı sert rejimli müstemlekede 17 yılğa üküm etti.
- 2024 senesi bozarğa aynıñ 28-nde Nariman Celâl Ukrayina ve Rusiye arasında esir deñiştirilüvi çerçivesinde Rusiye esirliginden azat etildi. Onen beraber daa doquz Ukrayina vatandaşı azat etildi.
- Azat etilgen soñ Celâl faal uquq qorçalayıcı ve cemaat-siyasiy faaliyetini devam ete, Qırımnıñ işğalden azat etilmesi ve Qırımtatar halqınıñ aqları içün küreşe. Hususan, 2025 senesi qara qış ayında o, BMTnıñ Havfsızlıq Şurasına muracaat etip, işğalli akimiyet tarafından basqığa oğrağan Ukrayin siyasiy mabüslerine ve Qırım sakinlerine qoltutmağa çağırdı.
Підписуйтеся на новини Суспільне Крим у Telegram, WhatsApp, Facebook, TikTok та YouTube
