Ukrayinada Qırımnıñ Krasnoperekopsk şeer mahkemesiniñ ve Sevastopolnıñ (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adnıñ) Nahimov rayon mahkemesiniñ eki sabıq mahkemecisi ğıyabiy şekilde mahküm etildi. Yarımada Rusiye ordusı tarafından işğal etilgen soñ, olar işğalcilerge qoşuldılar.
Qırım ve Sevastopol (Aqyar) şeeri prokurorlığınıñ Telegram kanalında bu aqqında haber etildi.
Qayd etilgenine köre, "mahkemeciler"den biri "Nahimov rayon mahkemesiniñ reisiniñ muavini", digeri ise "Krasnoperekop rayon mahkemesiniñ mahkemecisi" vazifesine tayin etildi.
"Tecavuzcı devletniñ menfaatlarında öz "vekâletleri"ni yerine ketirip, mahküm etilgenler yarımadada mahkeme akimiyetiniñ işğalli organlarınıñ çalışmasını temin ete, em de Rusiye Federatsiyasınıñ vekillerine Ukrayinağa qarşı bozuv faaliyetini alıp barmaqta yardım ete ediler", — dep aytıla haberde.
Olar devlet hainliginde qabaatlanıp, 12 ve 13 yılğa qadar apis cezasını aldılar.
Qırım MC ve Sevastopol (Aqyar) şeeriniñ prokurorlığı Suspilne Qırımğa añlattı ki, qabatalanğan adam olmadan mahsus makeme oturışları ("ğıyabiy ükümler") neticesinde çıqarılğan ükümler umumiy şekilde aqqını qazanalar. Yani apellâtsiya şikâyetnamesi berilmese, apellâtsiya şikâyetnamesini berüv müddeti (üküm çıqarılğan 30 kün soñ) bitecek soñ aqqını qazanır.
Apellâtsiya şikâyetnamesi berilse ve lâğu etilmese, apellâtsiya makemesi qarar alacaq soñ üküm aqqını qazana. Aynı zamanda adam tutulğan vaqıttan berli ceza müddeti başlap sayıla.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
