Mayısnıñ 10 künü "istegenlerniñ birleşmesi" sammitinde iştirak etmek içün Kiyevge kelgende, Büyük Britaniyanıñ baş naziri Kir Starmer, qırımtatar "Musafir" restorannı ziyaret etip restoran hadimlerine Qırım qaytqan soñ nevbetteki körüşüv, Bağçasarayda olacağını ayttı.
Bu aqta restoran, öz Facebook saifesinde Starmernen videonı paylaşıp bildirdi.
"Kelecek sefer – rusiye varvarlarından serbest etilgen Bağçasarayda", – bildirdi britaniyalı premyer.
Öz nevbetinde qırımtatar halqnıñ Meclis başı Refat Çubarov, bu "güzel areketi" olğanını ayrıca qayd etti.
Musafir de Starmer, olardan er şeyniñ bir parçasını sımarış etkenini videonıñ tübündeki tefsirlerde cevap berdi.
"Aşhanenen tanış olğan: yantıq, çiberek, et", — dep qoştılar olar.
Kiyevde mayıs aynıñ 10-nda "istegenlerniñ birleşmesiniñ" körüşüvi
10-cı mayıs künü Kiyevde "istegenler birleşmesiniñ" toplaşuvı olıp keçti. Ukrainağa Frenkistan prezidenti Emmanuel Makron, Poloniya ve Büyük Britaniyanıñ baş nazirleri Donald Tusk ve Keyr Starmer, Almaniya kantsleri Fridrih Merts keldiler. Toplaşuvda 35 memleketniñ vekilleri de iştirak ettiler.
Toplaşuv devamında "istegenlerniñ koalitsiyası" mayıs 12-den başlap Ukraina ve Rusiye arasında iç bir şartsız bütünley ateşniñ kesüvi aqqında kelişti. Bu deñizde, avada ve topraqtaki er taraflama ateş toqtatuvı olmalı.
Keyr Starmer qayd etkeni kibi, eger ateş kesüvine riayet etilse, deral tınçlıq muzakereleri başlanacaq. Eger Rusiye şartsız 30 künlük tınçlıq-amanlıqqa razı olmasa, AB memleketleri AQŞ ve Britaniyanen muvafıqlaşıp, oña qarşı endi azırlağan sanktsiyalarnı qoyacaqlar.
Ateşkeslikniñ nezaretini "AQŞ ile beraber" temin etmek mümkün, dep qoştı Zelenskiy.
Ukraina Prezidenti, ukrain ve rus askerlerini cebeden 30 kilometr uzaqlıqta ayırmaq ğayesini ömürge keçirmek mümkün olmağan dep sayğanını, Ukrainağa böyle teklifler kelmegenini bildirdi.
Körüşüvden evel, em de ondan soñ ""istegenlerniñ koalitsiyası" azaları AQŞ prezidenti Donald Trampnen telefon vastasınen qonuştılar, dep bildirdi matbuat konferentsiyasında kantsler Merts. Ve o, "Tramp bizim teşebbüsimizni paylaşıp oña qol tutqanını" dep qoştı.
Kremlniñ başı Volodımır Putin Ukrainağa mayıs 15-ten başlap İstanbulda iç bir türlü evelden şartsız doğrudan-doğru muzakerelerni ğayrıdan başlamağa teklif etti. Bunıñ aqqında o, mayıs 11 gecesi Kremlde ötkerilgen matbuat-konferentsiyasında bildirdi.
Çıqış vaqtında Putin, mayıs 12-de başlanmaq kerek olğan 30 künlük ateşkeslikke ait "istegenler koalitsiyasınıñ" teşebbüsini bir kere bile añmadı. Bu teklif, endi 20-den ziyade memleketten, şu cümleden Frenkistan, Almaniya, Büyük Britaniya ve Poloniyadan yardım alsa da, Putin onı episini añmadı.
Bundan evel Putin idaresiniñ vekili Peskov, ateş kesüvi boyunca "Rusiyeniñ öz mevamı bar", amma 30 künlük ateşkeslikni baqıp çıqacağını bildirdi.
Telegram, WhatsApp ve Facebookta Suspilne Qırım haberlerine abune oluñız
