Ukrayin suvlarında Dunay yalısında tutulğan çetel gemisiniñ kapitanı işğal etilgen Qırım üzerinden agro mahsukatnıñ qanunsız çıqarılmasında şübheli sayıldı. Onı Rusiyenen işbirlik yapqanında ve qanunnı tekrar bozğanında qabaatlaylar.
Qırım Muhtar Cumhuriyeti ve Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) şeeri prokurorlığı bu aqqında haber berdi.
Tahqiqat malümatına köre, 2024 senesi boş ayda onıñ reberligi altında gemi, Ukrayina qanunlarına köre er angi gemiler içün qapatılğan Sevastopol (Aqyar) limanına kirdi. Anda gemi 4,6 biñ tonnadan çoq boğdaynı yükledi — bu boğday Zaporijjâ ve Herson vilâyetleriniñ vaqtınca işğal etilgen qısımlarından çıqarılğanı tahmin etile.
Daa soñra kapitan qaidelerni daa bir kere bozdı — gemi Sevastopol (Aqyar) limanını terk etti. Öz areketlerini gizlemek içün, o, avtomatik identifikatsiya sistemasını (AIS) — gemilerniñ areketini köstergen sistemanı — vaqtınca söndürdi ve marşrut malümatını sahte etti.
2025 senesi çiçek ayında bu gemini Ukrayinanıñ içki suvlarında, Dunay özeninde tuttılar. Mahkeme qararınen apiske alındı.
Prokurorlıq qayd etti ki, kapitanğa işğal etilgen topraqlarnen sıñırnı keçüv tertibini tekrar bozğanı ve devlet menfaatlarına zarar ketirgeni içün 5 yılğa üküm etile bilir.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
