Avropa insan aqları mahkemesi tanıdı ki, Rusiye işğal etilgen Qırımda insan aqlarını muntazam sürette boza. Ukrayina, 2014 senesinden berli devam etken bu ameliyatlarnıñ inandırıcı delillerini taqdim etti. Mahkemede Ukrayinlerniñ biñden çoq şahsiy davası qayd etildi.
AİAMniñ Ukrayin vekâletlisi Marğarıta Sokorenko Qırım.Aqiqatqa bunı bildirdi.
Onıñ qayd etkenine köre, mahkeme Qırım işğalinden berli devam etken bozuvlarnıñ devamlılığını tanıdı.
"Ukrayina, işğal etilgen Qırımda Rusiye Federatsiyası tarafından insan aqlarınıñ bozuluvı boyunca sistematik siyasetniñ kerçekten bar olğanını isbatladı. O, 2014 senesi ya da 2015 senesi olğan şeylerni qayd etmegen edi, bu areketler Qırım işğal etilgen soñ yapılğan edi, ve olar devam ete, çoq insanğa nisbeten tekrarlana", — dep Sokorenko ayttı.
Sokorenkonıñ aytqanına köre, AİAMniñ bu qararı mahkemege berilgen Ukrayinlerniñ şahsiy şikâyetlerini baqmaq içün müim oldı. Umumen 2025 senesi mayıs ayına qadar Avropa insan aqları mahkemesinde Qırımda insan aqlarınıñ bozuluvınen bağlı 1101 dava qayd etildi. Olardan tahminen 60%-i mülkniñ mülkiyetsizleştirilmesinen bağlı.
Ukrayina Adalet nazirligi bu şahsiy davalarnı alıp barmay, amma Mahkemeniñ ricasınen davalarda üçünci taraf olaraq iştirak ete.
2014 senesinde Adalet nazirligi Rusiyege qarşı AİAMde işğal etilgen yarımadada sistematik bozuvlar, hususan mülkniñ barışıqlı saipligi aqqı boyunca devletlerara dava açtı. 2023 senesi bozarğan ayda Mahkeme, Rusiyeniñ areketlerini ve Ukrayin qanunlarınıñ rus qanunlarına deñiştirilmesini qanunsız dep tanıp, Ukrayina faydasına qarar çıqardı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
