Ukrayinada tahminen 30 jurnalist kirgen 100 belli vatandaş mabüsinden ibaret cedvel tizildi. Vesiqa Rusiye tarafına Halqara Qızıl Haç Eyyeti vastasınen berildi.
Prezident ofisiniñ yolbaşçısınıñ muavini İrına Vereşçuk bunı bildirdi, dep ZMINA yazdı.
Onıñ aytqanına köre, Ukrayina Rusiye Federatsiyasında qanunsız tutulğan jurnalistlerni teşkerdi ve belgiledi. Lâkin Rusiye olarnı qaytarmağa red etip, tuvğanları arasında narazılıq derecesini arttırmağa tırışa, böylece olar Ukrayina akimiyetine basqı yapa bileler.
"Bunı yahşı añlaymız ve qorantalarğa sabırları içün teşekkürler bildiremiz. Rusiye basqısına boysunmağanıñız içün. Ukrayinanıñ yapmaq kerek olğanını yapamız. Biz muracaat ettik, cedveller tizdik, Merkeziy qıdıruv agentligi (HQHE — muar.) vastasınen Rusiye tarafına muracaat ettik. Olarnı qaytarmağa talap etemiz, ve bu cedveller bar. Şimdi muzakere esnasında bu cedvellerni kene yañartıp, tekrar berdik", — dep Vereşçuk qayd etti.
O şunı da qoştı ki, Rusiye esirliginde bulunğan jurnalistlerni qaytarmaq içün halqara teşkilâtlarnı, hususan jurnalistlerni celp etmek kerek olacaq.
Hatırlatamız ki, Rusiye tarafından qanunsız sürette mahküm etilgen Qırım jurnalisti Vladıslav Yesıpenkonıñ davası, matbuat serbestliginiñ eñ ciddiy bozuluvları cedveline kirsetildi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
