19 yılğa mahküm etilgen Qırımtatar jurnalisti Remzi Bekirovğa Abakan şeeriniñ 33-nci tüzetüv müstemlekesinde namaz qılmağa izin berilmey.
Siyasiy mabüsniñ adliyecisi müstemlekege ziyareti neticesinde bunı bildirdi, dep "Qırım birdemligi" haber berdi.
2024 senesi boş ayında müstemlekege kelgen soñ, Bekirovnı ekinci qattaki ayrı blokqa avuştırdılar, anda nezaret kameraları odalarnıñ bir qısmını qaplamay, ve musulman mabüsler namaz qıla bileler. İlk qış ayında onı birinci qatqa avuştırdılar, anda nezaret kameraları yerleştirilgen.
"Bir vaqıtları anda dualar qıla edi, soñ kütleviy şekilde ŞİZOğa yerleştirmege başladılar", — dep advokat tarif etti.
Remzi Bekirov, namaz içün berilgen cezalarğa itiraz bildirip, müstemlekege qarşı dava açtı, amma mahkeme bunı "kündelik tertibiniñ bozuluvı" olaraq tanıdı. Bundan soñra, qoşma nezaret kamerası qoyuldı, ve dua etmek içün yer qalmadı.
"Bazı vaqıtları anda namaz qıla edi, soñ kütleviy şekilde ŞİZOğa yerleştirmege başladılar, evel ayağında turıp namaz qılğanı içün ŞİZOğa yollanılsa, şimdi oturıp oquğanına baqmadan, anda yollanıla. Umumen [namaz] qılmağa bermeyler", — dep siyasiy mabüsniñ apayı Halide Bekirova qayd etti.
Advokatnıñ aytqanına köre, çiçek ayınıñ 24-nde — uquq qorçalayıcınıñ ziyareti arfesinde jurnalist kartserden çıqtı.
Bekirovğa qarşı basqı Abakanğa keçken soñ bayağı arttı. O, bir qaç kere ŞİZOğa, gece namaz qılğanı, havluğa namaz qılğanı, hadimnen selâmlaşmağanı ya da qalpaq taqmağanı içün yollanılğan edi. İlk devirde o, tuvğanlarına telefon etip olamay edi, lâkin elâl aşlar olmağanı içün aştan vazgeçmege mecbur edi.
"Şimdi onıñ içün dinini serbest olaraq kütmek aqqı içün küreş prioritet ola", — dep advokat qayd etti.
Remzi Bekirov aqqında ne bilemiz
Remzi Bekirov — Qırım sakinlerine qarşı siyasiy sebepli davalarda tintüv ve makemelerniñ onlayn yayınlarını alıp barğan içtimaiy jurnalisttir. O, Qırımdaki siyasiy mabüslerniñ qorantalarına yardım etmek ğayesiniñ teşebbüsçisidir. Onıñ üç çağına yetmegen balası bar.
2019 senesi saban ayınıñ 27-nde Qırımda kütleviy tintüvler keçirildi. Taqiqat tedbirleri esasen qırımtatarlarnıñ yaşağanları Aqmescit civarındaki Bavurçı, Mamaq, Yañı Abdal köylerinde keçirildi. O vaqıt Rusiye FSBniñ hadimleri yigirmi insannı tuttılar. Daa üçü bir qaç kün içinde Rostov-na-Donu şeerinde tutuldı, üçü qıdıruvğa ilân etildi. Daa soñ bu iş üzerinde daa eki qırımtatar adamı tutuldı.
25 qırımtatar cemaat faalcisi "Hizb ut-Tahrir" islâm siyasiy firqasında iştirak etkeninde qabaatlandı. Apiske alınğanlarnıñ çoqusı "Qırım birdemligi" uquq qorçalayıcı birleşmesiniñ iştirakçileridir. Şaban Umerov, Remzi Bekirov, Riza İzetov ve Raim Ayvazov Rusiye Ceza qanunnamesiniñ 205.5 maddesiniñ 1-inci qısmına binaen terror teşkilâtınıñ faaliyetini teşkil etüvde qabaatlanalar.
2022 senesi saban ayınıñ 10-nda Rostov-na-Donudaki Cenübiy bölge arbiy makemesi, uquq qorçalayıcı Remzi Bekirovnı 19 senege maküm etti.
2024 senesi oraq ayında Bekirovnı Rusiyeniñ Krasnoyarsk vilâyetindeki 2. Yeniseysk apishanesinden çıqardılar. Bundan evel onı Qırımğa yaqın olğan Rusiye Federatsiyasınıñ Rostov vilâyetindeki müstemlekesine etap etmege red etken ediler. Adam tek maküm etilecek soñ etap yerine şikâyet etmek mümkün eken.
Qırım siyasiy mabüsi, 2024 senesi saban ayında müstemlekede bulunğan vaqıt apis cezasına qadar müddetini esapqa almağa tırıştı. Amma Bekirovnıñ davası baqılğan Çita şeeriniñ 2-nci Şarqiy bölge arbiy makemesi cevap yollamadı, ve müddetniñ ğayrıdan sayılması aqqında qararnı qabul etmedi. Bu sebepten qırımtatar apishanede belgilengen müddetten çoq tutuldı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
