İşğalciler Qırım mekteplerinde balalarnıñ areket tarzı içün baa qoymağa yañından başlamağa planlaştıralar. Milliy muqavemet merkeziniñ mütehassıslarına köre, bu da ealini qorqutmaq içün qullanılğan daa bir alet olur. Mektep talebeleri vastasınen qorantalarına basqı yapa bilirler. Hususan, Ukrayin tilinde laf etkenlerge.
Milliy muqavemet merkeziniñ haberinde bu aqqında aytıla.
"Vaqtınca işğal etilgen Qırımda ŞSCBne yañıdan qaytalar. İşğalciler, sovet devirinde olğanı kibi, mekteplerde areket tarzı içün — itaatlılıq içün ballarnı qoyarlar. Çünki "böyle daa terbiyeli olur", dep "tasil naziri" Lavrık ayttı. Amma bu "nostalgiya"nıñ artında — nezaret ve basqı tura. Balalar vastasınen qorantalarına basqı yapa bilirler. Hususan, Ukrayin tilinde laf etken ya da "rus tili"ni qabul etmegenlerge", — dep MMM yazdı.
Hatırlatamız ki, çiçek ayınıñ 25-nde brifing vaqtında Rusiye tasil naziri Sergey Kravtsov Rusiye mekteplerinde, em de işğal etilgen Qırım mekteplerinde areket tarzı içün baa qoymasınıñ kirsetilüvi aqqında bildirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
