Prezidentniñ Qırımdaki temsilciligi "Hizb ut-Tahrir davası"nıñ ekinci Canköy gruppasınıñ mabüslerine qanunsız cezalarnıñ berilmesini takbih etti. Rusiye Federatsiyasınıñ Rostov-na-Donu şeerinde Cenübiy bölgeniñ arbiy mahkemesiniñ çiçek ayınıñ 29-nda çıqarğan qararı — gumanitar uquqnıñ bozuluvıdır.
Ukraina prezidentiniñ Qırımdaki temsilciliginiñ beyanatında bu aqqında aytıla.
"Qırımtatar halqınıñ temsilcileri Halil Mambetov, Refat Seydametov, Osman Abdurazakov, Leman Zekeryayev, Ayder Asanov ve Ekrem Kroş 11 yıldan 14 yılğa qadar apis cezasını aldılar. Advokatlar bir çoq protsessual bozuv arasında tintüvlerniñ qanunsızlığı, kerekli delillerniñ olmağanı, operativ-qıdıruv faaliyetiniñ vesiqalarınıñ kerekli şekilde resmiyleştirilmegen qullanılğanı, qoruv aqqı bozulğanı ve cinaiy davanıñ bütün basamağında imayeniñ iştiragi aqqında qayd ettiler. Qabaatlanğanlar, taqip etilgenleri tek diniy ve faal vatandaşlıq nazar noqtaları içün olğanını qayd ettiler", — dep temsilcilikniñ beyanatında bildirildi.
Temsilcilik halqara toplulıqnı vaqtınca işğal etilgen Qırımda insan aqlarınıñ bozuluvına keskin cevap bermesine, Rusiyege qarşı siyasiy ve sanktsiyalar basqısını quvetleştirmesine çağırdı.
Hatırlatamız ki, 14 yılğa apis cezasına mahküm etilgenler: Canköyniñ 69 yaşındaki ev tehnikası tamircisi Halil Mambetov, Canköy rayonından 55 yaşındaki iş adamı Refat Seydametov, 41 yaşındaki qurucı Osman Abdurazakov, 51 yaşındaki qurucı Leman Zekeryayev, 31 yaşındaki ödeme terminalleriniñ tamircisi Ayder Asanov ve 39 yaşındaki ev tehnikası tamircisi Ekrem Kroş.
Tek Ayder Asanov 11 yıllıq apis cezasına mahküm etildi, birinci üç yılnı apishanede keçirecek, qalğan müddetini ise — sert rejimli müstemlekede keçirecek, soñra bir yıllıq areketi sıñırlaycaq.
"Hizb ut-Tahir" davasınıñ ekinci Canköy gruppası aqqında ne bilemiz
Qara qış ayınıñ 24-ünde Canköy rayonınıñ köylerinde insanlarnıñ evleri tintilgen soñ altı qırımtatar adamı tutuldı ve Aqmescitke ketirildi. Anda ertesi künü olar tevqif etildi ve 1. SİZOda qapatıldı. Söz Ekrem Kroş, Ayder Asanov, Leman Zekeryayev, Osman Abdurazakov ve Refat Seydametov aqqında yürsetile.
Arman ayında olarnıñ cinaiy davasınıñ bilgileri Rostov-na-Donudaki Cenübiy bölge arbiy makeemsine yollandı. Olar, Rusiyede yasaqlanğan ve dünyanıñ ülkeleriniñ çoqusında serbest şekilde faal etken "Hizb ut-Tahrir" islâm fırqasında iştirak etmege qabaatlanalar.
Berim ayınıñ 13-ünde belli oldı ki, "dava"nıñ iştirakçileri Aqmescitteki taqiqat izolâtorından Rostov-na-Donudaki 1. SİZOğa etap etildi.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
