"Hizb ut-Tahrir davası" çerçivesinde Rusiye işğalcileri tarafından 13 yıl apis cezasına mahküm etilgen Qırım siyasiy mabüsi Lenur Seydametov, doğğan yeri Özbekistanğa ekstraditsiya etile bile. Şimdi o, Voronejdeki tahqiqat izolâtorında buluna.
Bunı Suspilne Qırımğa siyasiy mabüsniñ apayı Acire Seydametova bildirdi.
Onıñ aytqanına köre, Lenur Qırımğa 2012 senesi keldi, anda olar evlendiler ve bala doğurdılar.
"O, bütün protseduralarnı keçti: vaqtınca yaşamaq içün izin, kiriş-çıqış ve ilâhre. Ve 2014 senesi pasportnı almağa kerek olsa da, vaqtı yetmedi. Advokat da bir şey bilmey. Er şeyni men ögrenecegim, aqayımnıñ aytqanlarını. Mektüpte o, Voronej SİZOsında olğanını yazdı. Onıñ aytqanına köre, başta onı bölünüv merkezine yolladılar. Amma anda onı red ettiler. O, Özbekistanğa ekstraditsiya etilecek, dep añlattılar", — dep qadın tarif etti.
Onıñ aytqanına köre, aqayı Özbekistanda 2012 senesinden berli yaşamay, anda tek anası buluna.
"Qırımda onıñ tuvğan qardaşı yaşay. Bizler, onıñ bütün qorantası, onıñ soyadımız. Biz qayd etilgenmiz. 2021 senesi apiske alındı, 2022 senesi Rostov mahkemesi onı mahküm etti. Akimiyetniñ devirilüvinde qabaatlaylar", — dep Acire Seydametova qoştı.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
