İşğal etilgen Qırımda çiçek ayınıñ 26-29 künleri furtuna havfı ilân etildi. Telükeli ava tahmin etile. Küçlü yağanaqlar, boranlı yel ve -2 °C qadar suvuq beklenilir.
İşğalli Qırım FVN bu aqqında haber etti.
"Çiçek ayınıñ 26-nda kündüz, çiçek ayınıñ 27-nde gece ve saba Qırımda yağmur, cenübiy, merkeziy ve şarqiy rayonlarda küçlü yağanaqlar, furtuna beklenilir. Cenübiy-ğarbiy yel quvetleşir, şimaliy-ğarbiy yel 15-20 m/s olur. Çiçek ayınıñ 28-nde ve 29-nda gece ve saba yayla ve dağ ögündeki rayonlarda -2° derecege qadar buzlavuq beklenilir", — dep aytıla haberde.
Çiçek ayınıñ 26-ndan 29-na qadar dört kün devamında furtuna havfı ilân etile.
Hatırlatamız ki, 2025 senesi çiçek ayınıñ 23-26 künleri işğal etilgen Qırımnıñ merkeziy ve şarqiy rayonlarında yüksek yanğın telükesi beklenilir edi. O, sıcaq ve quru avanen bağlıdır, bu ise orman ve yayla yanğınlarınıñ telükesini arttıra.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
