Rostov-na-Donudaki Cenübiy bölgeniñ arbiy mahkemesinde "Hizb ut-Tahrir davası"nıñ beşinci Bağçasaray gruppasınıñ altı qırımtatar siyasiy mabüsiniñ davası baqıldı. Olarnıñ apis müddeti 2025 senesi arman ayınıñ 23-ne qadar uzatıldı.
Advokat Emil Kurbedinov bunı bildirdi, dep "Qırım birdemligi" yazdı.
Abdülmecit Seitumerov, Amethan Umerov, Eldar Yakubov, Seydamet Mustafayev ve Remzi Nemetullayev Rusiyeniñ Rostov vilâyetindeki 1-nci GUFSİN SİZOsında qalacaqlar. Ruslan Asanov 5-nci SİZOda bulunacaq.
İmayeciniñ aytqanına köre, oturış vaqtında imayeci taraf, öz delillerini taqdim etmege planlaştıra edi, amma prokuror qabaatlayıcı tarafnıñ daa eki şaatını — FSB hadimi ve Qırım musulmanları diniy idaresiniñ temsilcisini çağırmağa muracaat etti. Olarnıñ sorğusı mayısnıñ 19-na planlaştırıla.
Qabaatlayıcı taraf delillerini taqdim etken soñ, mudafaa davasına keçecek.
"Bizler tintüv keçirilgen şahıslarnıñ çağıruvlarınen bağlı bir sıra tedbirlerni planlaştırdıq. Çünki imayeci tarafnıñ ve imayemizniñ delillerinden biri şu ki, tintüv vaqtında olarğa kitaplar atılğan edi. Bu aqqında mahkeme tahqiqatında da aytmağa isteymiz ve bu tedbirlerde olğan, tintüvler keçirgen er kesni çağırtmağa isteymiz — bu FSB hadimleri, şaatlar, mütehassıslar", — dep Emil Kurbedinov yekünledi.
"Hizb ut-Tahrir davası"nıñ beşinci Bağçasaray gruppası aqqında ne bilemiz
2023 senesi arman ayınıñ 24-ünde rus quvetçileri, qırımtatar Ruslan Asanov, Seydamet Mustafayev, Remzi Nemetulayev, Abdulmecit Seitumerov, Amethan Umerov ve Eldar Yakubovnıñ evlerini tinteler.
Beş adam, cemaat faalcileri ve çoq balalı babalardır. Keçenlerde Seitumerovnıñ balası doğdı. Abdulmecit, 2020 senesi saban ayında teqif etilgen, 17 ve 14 senege maküm etilgen Bağçasaraydan süyasiy mabüsler olğan Osman ve Seitumer Seitumerovnıñ doğmuş qardaşıdır.
Terrorcılıqta qabaatlanıp tevqif etilgen başqa qırımtatarlarnı destek etici numayışlarda bütün altı Bağçasaray faalcisini bir qaç kere tuttılar.
Nimetulayev ve Mustafayevni bir qaç künge tevqif ettiler. İşğalciler, "vatandaşlarnıñ kütleviy bulunmalarınen içtimaiy nizamnı bozğanı içün" Yakubovğa 10 biñ rublelik para cezasını berdiler. Umerov ise mahsus tutun müessisesinde bir qaç kün keçirdi ve "FV ya da telükesi vaqtında qaidelerni riayet etmeme aqqında" aynı maddege mücibi para cezasını ödedi.
2023 senesi berim ayında "UFSBniñ ayrıca müim meseleler üyken taqiqatçıcı" Vitaliy Vlasov Yakubovğa ve davanıñ başqa iştirakçisiniñ apayı Feride Halilovağa aqaylarınen körüşmege izin bermedi. Beşinci Bağçasaray gruppasınıñ iştirakçileriniñ apayları aynı rednamelerni aldılar.
Hizb ut-Tahrir, islâm siyasiy fırqasıdır. 2023 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
2024 senesi orta küz ayınıñ 21-nde Rostov-na-Donu Cenübiy bölgesiniñ arbiy makemesi, yañı deliller olmağanına baqmadan, Abdulmecit Seitumerov ve beşinci Bağçasaray gruppasınıñ başqa mabüsleriniñ apis müddetini daa eki ayğa uzattı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
