Otit hastalığını çekken "Hizb ut-Tahrir davası"nıñ birinci Aqmescit gruppasınıñ mabüsi Teymur Abdullayev, eki aydan soñ Başqırtstannıñ tüzetüv müsyemlekesiniñ ceza izolâtorından (ŞİZO) çıqtı. İşğalli makeme onı 16,5 yılğa üküm etti.
Onıñ anası Dilâra Abdullayeva "Qırım birdemligi" cemaat teşkilâtına kiçik aynıñ 14-nde bunı bildirdi.
2024 senesi ilk qış ayınıñ 12-nde qırımtatar müstemlekeniñ yolbaşçısınıñ kamerasına barğanda saba namazını toqtatmağanı içün 15 künge ŞİZOğa yerleştirildi. O vaqıttan berli siyasiy mabüsniñ ceza izolâtorında bulunması devam ete edi.
Bir kün soñra qorantasına yazğan mektübinde, adam kiçik aynıñ 10-nda çıqtı, dep bildirdi.
"Bu kere ŞİZOda 60 kün yattım, umumen ise — 1009 kün (müstemlekede beş yıl devamında — muar.)", — dep Abdullayev qayd etti.
Kremlniñ vekili, şimdi, 2024 senesi ilk qış ayında ŞİZOda bulunğanına qadar sert şaraitli kamerada tutulğanını qoştı.
Bundan ğayrı, "Hizb ut-Tahrir davası"nıñ Yalta gruppasınıñ mabüsi Muslim Aliyev ve namaznı toqtatmağa istemegen daa eki musulman izolâtorğa yollanıldı.
"Bu [daimiy namaz] onıñ [2-nci tüzetüv müstemlekesiniñ müdiriniñ] öz-özüni maqtanmasınıñ sebebi oldı. O, açuvlandı ve bizni ŞİZOğa qapattı. Bizge Quranlarnı kamerağa alıp ketmege de yasaq ettiler, çünki yerli idare [Rusiye Federal Cezalandıruv hızmeti] bunı yasaq etti, çünki [Quranlar[ arap tilinde", — Abdullayev dep añlattı.
Hatırlatamız ki, onıñ apayı 2024 senesi boş ayda, hastalıqtan soñ aqayınıñ bir qulağında eşitüv qabiliyetini coydı, dep bildirdi. Kreml mabüsi da gipertonik hastalığından hastadır, onıñ körmesi fenalaştı.
"Hizb ut-Tahrir davası"nıñ birinci Aqmescit gruppası aqqında ne bilemiz
2016 senesi orta küz ayınıñ 2-nde Aqmescit rayonınıñ Kamyanka ve Stroğanivka mikrorayonlarında kütleviy tintüvler keçirildi. Beş adam tutuldı ve Rusiyede yasaq etilgen "Hizb ut-Tahrir" islâm siyasiy firqasınıñ faaliyetinde qabaatlanğan edi.
2019 senesi bozarğan ayda Rostov-na-Donu Cenübiy bölgeniñ arbiy makemesi "Hizb ut-Tahrir davası"nıñ birinci Aqmescit gruppasınıñ mabüslerini: Teymur Abdullayev sert rejimli müstemelekede 17 senege, Uzeyir Abdullayev 13 senege, Rustem İsmailov 14 senege, Ayder Salidenov ve Emil Cemadenov 12 senege maküm etti.
2019 senesi ilk qış ayınıñ 24-nde Rusiye Yuqarı makemesi mabüslerniñ ükümlerini 6 ayğa qısqartıp, deñiştirdi. Böyleliknen, Teymur Abdullayev 16 sene 6 ay apis cezasına ve 1 sene 4 aylıq memuriy nezaret cezasına maküm etildi, Uzeyir Abdullayev 12 sene 6 ayğa, Rustem İsmailov 13 sene 6 ayğa, Emil Cemadenov 11 sene 6 ayğa, Ayder Salidenov 11 sene 6 ayğa apis cezasına maküm etildi.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp ve Facebookta Suspilne Qırım haberlerine abune oluñız