İşğal makemesi ile 16,5 yılğa apishanege makeme etilgen qırım siyasiy mabüsi Teymur Abdullayevni Başqurtistan Cumhuriyetindeki cezahanesine yerleştirdiler. Erkek, namaz vaqtında müstemleke başınen selâmlaşmağa red etken sebebi içün.
Bunıñ aqqında siyasiy mabüs, advokat Emil Kürbedinovge mektübinde tarif etken, haber ete Qırım birdemligi.
Belli olğanı kibi, ilk qış aynıñ 12 qırım tatarını 15 künge cezahanesine yolladılar. Aynı aynıñ soñunda bunıñ aqqında belli oldı. Siyasiy mabüsi tarif etkeni kibi, onı ve tutuvnıñ qattı şaraitlerde bulunğan daa eki musulmannı kamerağa müstemleke başınıñ ziyareti vaqtında namazı içün cezahanege yolladılar.
"Müstemleke başı, onnen selâmlaşmaq içün namaznı toqtatmağa talap. etmege başlap bizim aqlarımıznı bozıp din merasimine riayet etmege keder etken edi. Amma biz devam ettik, çünki vacip namazını toqtamağa olmay, istisna olaraq ayatnı qurtarmaq kerek olğan alda. O, belki de onıñ izzetinefsine tiygen. Açuvlanıp bizni cezahanesine qapatqan. Daa Quran, arap tilinde yazılğanı ve onı yerli idaresi yasaq etkenine esaslandırıp onı kamerağa almağa yasaq ettiler", – tarif etti siyasiy mabüs.
Daa erkek, yarım yıl evel başqa siyasiy mabüslernen beraber kamerağa Qurannı almağa yasağı sebebinden prokuraturağa muracaat etkenini dep qoştı. Amma idare, böyle yasağı qanunsız olğanını dep cevap berdi.
"Hizb ut-Tahrir davası"nıñ birinci Aqmescit gruppası aqqında ne bilemiz
2016 senesi orta küz ayınıñ 2-nde Aqmescit rayonınıñ Kamyanka ve Stroğanivka mikrorayonlarında kütleviy tintüvler keçirildi. Beş adam tutuldı ve Rusiyede yasaq etilgen "Hizb ut-Tahrir" islâm siyasiy firqasınıñ faaliyetinde qabaatlanğan edi.
2019 senesi bozarğan ayda Rostov-na-Donu Cenübiy bölgeniñ arbiy makemesi "Hizb ut-Tahrir davası"nıñ birinci Aqmescit gruppasınıñ mabüslerini: Teymur Abdullayev sert rejimli müstemelekede 17 senege, Uzeyir Abdullayev 13 senege, Rustem İsmailov 14 senege, Ayder Salidenov ve Emil Cemadenov 12 senege maküm etti.
2019 senesi ilk qış ayınıñ 24-nde Rusiye Yuqarı makemesi mabüslerniñ ükümlerini 6 ayğa qısqartıp, deñiştirdi. Böyleliknen, Teymur Abdullayev 16 sene 6 ay apis cezasına ve 1 sene 4 aylıq memuriy nezaret cezasına maküm etildi, Uzeyir Abdullayev 12 sene 6 ayğa, Rustem İsmailov 13 sene 6 ayğa, Emil Cemadenov 11 sene 6 ayğa, Ayder Salidenov 11 sene 6 ayğa apis cezasına maküm etildi.
Telegram, WhatsApp ve Facebookta Suspilne Qırım haberlerine abune oluñız