16,5 senege maküm etilgen qırımtatar Teymur Abdullayev ağrı ve qulağı yanğanından şikâyet ete. Adamnıñ otit tedaviyine ihtiyacı bar. O, Başqırtistan Cumhuriyetindeki 2-nci Salavat tüzetüv müstemlekesiniñ sert şaraitibde tutula.
Onıñ ömür arqadaşı Alime Abdullayeva "Qırım birdemligi" cemaat teşkilâtına ilk qış ayıñ 4-nde bunı bildirdi.
Müstemlekeniñ memuriyeti siyasiy mabüsniñ balalarınen devamlı körüşüvlerine izin berdi. Onıñ apayı dey ki, Abdullayev eki kere keskin nefes virus yuqunçına oğradı, bu da onıñ qulaqlarında ağrılarğa ketirdi. Qırımtatarnıñ aqayı, eşitüv qabiliyeti vaqtınca coyuldı, dep ayttı.
Alime, siyasiy mabüsniñ sağlığına ceza izolâtorında ve sert şaraitli kamerada çoq yıllar devamında tutulması menfiy tesir etti, dep bildirdi.
Abdullayevni aşqazan, qaraciğer, tiş ağrısı da raatsızlay.
"Eñ küçük oğlum bir kün bile lagerde oturmadı, aman-aman 5 yıl ceza izolâtorlarınıñ çuqurlarında ve sert tutuv şaraitinde keçirdi - bu qapalı suvuq kameralar, o ayat ve ölüm sıñırında", a dep qayd etti siyasiy mabüsniñ anası Dilâra.
Bundan evel advokat Rustem Kamilyev Teymur eñ az 874 kün devamında ŞİZOda tutılğanını aytqan edi.
Bundan da ğayrı, qırımtatar gipertoniya ve baş ağrılarından qasevetlene. Onıñ aytqanına köre, bunıñ neticesinde onıñ körügi fenalaşa.
"Uralda ava tez deñişe - şiddetli yağanaqlar, iklim deñişüvi gipertoniyalılarğa pek tesir ete. Ever o, tışarıda közlükler aqqında bilmey edi, şimdi olarnı iç qullanmay", - dep qayd etti o.
Hatırlatamız ki, Abdullayevniñ ömür arqadaşı 2024 senesi boş ayda, hastalıqtan soñ bir qulaqtan eşitüv qabiliyetini coydı, dep bildirdi. Kremlniñ reinesi gipertonik hastalığından da hastadır, onıñ körzleri fenalaştı.
"Hizb ut-Tahrir davası"nıñ birinci Aqmescit gruppası aqqında ne bilemiz
2016 senesi orta küz ayınıñ 2-nde Aqmescit rayonınıñ Kamyanka ve Stroğanivka mikrorayonlarında kütleviy tintüvler keçirildi. Beş adam tutuldı ve Rusiyede yasaq etilgen "Hizb ut-Tahrir" islâm siyasiy firqasınıñ faaliyetinde qabaatlanğan edi.
2019 senesi bozarğan ayda Rostov-na-Donu Cenübiy bölgeniñ arbiy makemesi "Hizb ut-Tahrir davası"nıñ birinci Aqmescit gruppasınıñ mabüslerini: Teymur Abdullayev sert rejimli müstemelekede 17 senege, Uzeyir Abdullayev 13 senege, Rustem İsmailov 14 senege, Ayder Salidenov ve Emil Cemadenov 12 senege maküm etti.
2019 senesi ilk qış ayınıñ 24-nde Rusiye Yuqarı makemesi mabüslerniñ ükümlerini 6 ayğa qısqartıp, deñiştirdi. Böyleliknen, Teymur Abdullayev 16 sene 6 ay apis cezasına ve 1 sene 4 aylıq memuriy nezaret cezasına maküm etildi, Uzeyir Abdullayev 12 sene 6 ayğa, Rustem İsmailov 13 sene 6 ayğa, Emil Cemadenov 11 sene 6 ayğa, Ayder Salidenov 11 sene 6 ayğa apis cezasına maküm etildi.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp ve Facebookta Suspilne Qırım haberlerine abune oluñız